कोल्हापूरच्या करवीर तालुक्यातील उजळाईवाडी येथे शुक्रवारी (5 डिसेंबर) रोजी दुपारी ही घटना घडली आहे. क्रिकेट खेळताना शेजारच्या घराच्या टेरेसवर गेलेला चेंडू आणण्यासाठी गेलेल्या 13 वर्षीय शाळकरी मुलाचा उच्चदाब विद्युत वाहिनीच्या संपर्कात येऊन त्याचा जागीच मृत्यू झाला आहे. मोहम्मद अफान असिफ बागवान (रा. बालाजी पार्क, उजळाईवाडी, ता. करवीर) असं या मृत्यू झालेल्या मुलाचं नाव आहे. ही दुर्दैवी घटना विमानतळ रोडजवळील हनुमंत खांडेकर यांच्या इमारतीवर घडली असून, गोकुळ शिरगाव पोलिस ठाण्यात अनअ‍ॅक्ट अ‍ॅक्सिडेंटची नोंद झाली आहे.

मित्रांबरोबर क्रिकेटचा आनंद घेताना दुर्दैवी घटना..
अफान हा वि. सा. खांडेकर प्राथमिक शाळेत इयत्ता सातवीत शिकत होता. शिक्षकांच्या संपामुळे शुक्रवारी शाळेला अघोषित सुट्टी असल्याने तो सकाळी साडेअकराच्या सुमारास मित्रांसोबत विमानतळ रोडलगत मोकळ्या जागेत क्रिकेट खेळण्यासाठी गेला. खेळताना मारलेला चेंडू शेजारच्या हनुमंत खांडेकर यांच्या बंगल्याच्या टेरेसवर गेला. चेंडू आणण्याच्या उद्देशाने अफान टेरेसवर चढला. तेवढ्यात इमारतीच्या अगदी दीड-दोन फूट अंतरावरून जाणाऱ्या 11000 व्होल्ट (11 केव्ही) क्षमतेच्या उच्चदाब विद्युत वाहिनीचा त्याच्या गळ्याला स्पर्श झाला. जोरदार विद्युत धक्का बसताच तो खाली कोसळला आणि जागीच मृत्यू पावला.

विमानतळाला वीजपुरवठा करणारी तार..
ही उच्चदाब वाहिनी उजळाईवाडीतील इमारतीवरीलून कोल्हापूर विमानतळाला वीजपुरवठा करते. घटनास्थळी मोठा आवाज होताच परिसरातील नागरिक धावले. अफानला बेशुद्धावस्थेत रुग्णवाहिकेतून सीपीआर रुग्णालयात दाखल करण्यात आले, मात्र डॉक्टरांनी त्याला मृत घोषित केले. पोलिसांनी घटनास्थळी धाव घेऊन पंचनामा केला. मृतदेह शेंडा पार्क येथे शवविच्छेदनासाठी पाठवण्यात आला असून, नातेवाईकांच्या ताब्यात देण्यात आला. या घटनेमुळे बालाजी पार्क परिसरात शोककळा पसरली आहे.

एकुलत्या मुलाचा करुण अंत, कुटुंबावर दु:खाचा डोंगर..
अफानचे वडील मोहम्मद असिफ बागवान हे कागल पंचतारांकित औद्योगिक वसाहतीतील खासगी कंपनीत नोकरी करतात. तसेच पार्टटाईम रिक्षाचालक म्हणूनही काम करतात. आई गृहिणी असून, दोन छोट्या बहिणी आहेत. अफान हा कुटुंबातील एकुलता एक मुलगा होता. त्याचा स्वभाव अत्यंत मनमिळावू आणि अभ्यासात हुशार होता, असे शेजारी सांगतात. कुटुंबीयांचा हृदय पिळवटून टाकणारा आक्रोश पाहून उपस्थित ग्रामस्थांच्या डोळ्यात पाणी तरळले.

‘शाळा सुरू असती तर कदाचित..’
ग्रामस्थांनी शिक्षकांच्या संपामुळे शाळांना सुट्टी जाहीर झाल्याबद्दल नाराजी व्यक्त करत सुरक्षा उपाययोजनांबाबत प्रश्न उपस्थित केले. “शाळा सुरू असती तर अफान घरीच असता आणि ही दुर्घटना घडली नसती,” अशी हळहळ नागरिकांनी व्यक्त केली आहे.

दरम्यान, उच्चदाब वाहिन्यांच्या सुरक्षित अंतराबाबत तातडीने कारवाईची मागणी देखील नागरिकांनी केली आहे. महावितरण कंपनीने घटनेची चौकशी करून जबाबदार व्यक्तींवर कारवाई करावी, अशीही मागणी परिसरातील रहिवाशांकडून होत असून या घटनेबाबत पोलिस तपास चालू आहे.

लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा