पन्हाळा तालुक्यातील देवगिरी फार्म येथे हा लग्नसोहळा पार पडला. यावेळी जणू “लग्न असलं तरी… कर्तव्य प्रथम” हा संदेश देणाऱ्या या डॉक्टर नववधूची चर्चा सर्वत्र सुरु आहे. नवरदेवाचे मामा आणि शिवसेनेचे जिल्हाप्रमुख नामदेव गिरी यांनी टिपलेल्या या क्षणांचा व्हिडीओ सध्या सोशल मीडियावर व्हायरल होत आहे.

कोल्हापूरच्या किल्ले पन्हाळगडाच्या पायथ्याशी देवगिरी फार्महाऊसमध्ये रविवारी ३० नोव्हेंबर रोजी पार पडला. या लग्न सोहळ्यात नववधू डॉ. प्रिया भारती यांचा ‘लग्न असलं तरी कर्तव्य प्रथम’ याचा प्रत्यय पाहायला मिळाला आहे. स्टेजवरच चक्कर येऊन कोसळलेल्या महिलेवर तात्काळ प्रथमोपचार या नववधूने केले आहेत. सकाळपासूनची दगदग आणि उपाशीपोटी असल्याने घाबरलेल्या महिलेला डॉ. प्रियाने प्रसंगावधान राखत उपचार करून शुद्धीवर आणले. हा व्हिडिओ सोशल मीडियात व्हायरल होऊन नेटकऱ्यांसह सर्वांनीच त्यांच्या तत्परतेचे कौतुक केलं आहे.

अक्षता पडताच घटना.. नववधूची तत्परता

हिंदू रीतीनुसार ‘शुभमंगल सावधान’ म्हणत भटजींनी लग्न लावल्यानंतर नवरीवर अक्षता पडल्या आणि धार्मिक विधींनी हा सोहळा पुढे सरकला. विधी संपल्यावर पै-पाहुणे नवदांपत्याला शुभेच्छा देण्यासाठी स्टेजवर गर्दी करू लागले. याचवेळी एका महिला पाहुणीला चक्कर येऊन पडल्याने मंडपात घाबरगुंडी उडाली. नातेवाईक, नवरदेव रोहित बुवा आणि सर्वांचीच यामुळे पळापळ उडाली. मात्र, नटून थटून, कपाळावर मुंडावळ्या बांधलेल्या डॉ. प्रिया भारती यांनी हक्कीच ‘कर्तव्य प्रथम’ असे म्हणत महिलेजवळ धाव घेतली. त्यांनी तातडीने प्रथमोपचार सुरू करून महिलेची विचारपूस केली, धीर दिला आणि उपाशीपोटीच चक्कर आल्याचे निदान करून जेवण आणि आरामाचा सल्ला दिला.

पन्हाळा तालुक्यातील चव्हाणवाडी बोरगाव येथील स्थापत्य अभियंता रोहित कृष्णात बुवा यांचे लग्न पुणे जिल्ह्यातील वेल्हे येथील डॉ. प्रिया भारती यांच्याशी पन्हाळ्यातील देवगिरी फार्म येथे साजरे झाले. लग्नावेळी उपस्थित नवरदेवाचे मामा, शिवसेनेचे कोल्हापूर जिल्हाप्रमुख नामदेव गिरी यांनी हा प्रसंग कॅमेर्यात टिपला. काही क्षणांतच महिलेला शुद्ध आली आणि तिने डॉ. प्रियाचे आभार मानले. या घटनेमुळे लग्नमंडपात सकारात्मक वातावरण निर्माण झाले.
Crime News : गृहप्रवेशाआधीच इंजिनिअरने नव्या घरात आयुष्य संपवलं, ‘त्या’ कारणामुळे शेजाऱ्यांची 20 लाखांची मागणी, 10 पानी चिठ्ठीत धक्कादायक उलगडा

नातेवाईकांचा अभिमान, सोशल मीडियावर कौतुकाचा वर्षाव

दरम्यान डॉ. प्रिया यांच्या कर्तव्यनिष्ठेचे नातेवाईक आणि पै-पाहुण्यांनी अभिमान व्यक्त केला आहे. ‘नववधू असूनही रुग्णसेवेला प्राधान्य दिले, हे खरे डॉक्टरपण आहे,’ अशी चर्चा मंडपात पाहायला मिळत होती. सोशल मीडियावर व्हायरल झालेल्या व्हिडिओमुळे इन्स्टाग्राम, फेसबुकवरून नेटकऱ्यांनी ‘डॉक्टर नववधू देवदूत’, ‘सेवेचा खरा अर्थ दाखवला’ अशा प्रतिक्रिया पाहायला मिळाल्या. लोकमतसह इतर माध्यमांतही ही बातमी प्रसिद्ध झाली असून, डॉ. प्रिया यांच्या या कृतीने वैद्यकीय व्यावसायिकांसाठी आदर्श निर्माण झाला आहे.

पाहा व्हिडिओ :

दरम्यान ही घटना वैयक्तिक नातेवाईकांपुरती मर्यादित न राहाता संपूर्ण समाजासाठी प्रेरणादायी ठरली. लग्नासारख्या शुभ प्रसंगातही कर्तव्याला प्राधान्य देणारी डॉ. प्रिया भारती-बुवा यांची तत्परता चर्चेत आहे. नवरदेव रोहित बुवा आणि कुटुंबीयांनीही त्यांच्या पत्नीबद्दल अभिमान व्यक्त केला आहे. मात्र अशा घटना समाजात मानवता व कर्तव्यभावनेचा संदेश देतात, हे मात्र नक्की..