कोल्हापूर जिल्ह्यातील हातकणंगले तालुक्यातील खोतवाडी (ता. हातकणंगले) येथे शाळेतील साडेआठ वर्षांच्या अल्पवयीन मुलीच्या बाबतीत ही घटना घडली आहे. गेल्या सहा महिन्यांपासून पाठलाग करून छेड काढणाऱ्या या 60 वर्षीय वृद्धाला स्थानिक महिलांनी चांगलाच चोप देऊन शहापूर पोलिसांच्या ताब्यात दिले. दशरथ भाऊ सोनटक्के (रा. चौंडेश्वरी कॉलनी, तारदाळ, ता. हातकणंगले) असे या संशयिताचे नाव आहे. पीडित मुलीच्या आईने शहापूर पोलिस ठाण्यात फिर्याद नोंदवली असून, पोक्सो कायद्यांतर्गत गुन्हा दाखल करण्यात आला आहे. मंगळवारी दुपारी उघडकीस आलेल्या या घटनेमुळे परिसरात खळबळ उडाली असून, पालकांमध्ये भीतीचे वातावरण पसरले आहे.

सहा महिन्यांपासून देत होता सतत त्रास..

पीडित मुलगी तिसरीत शिकत असून, ती शाळेला जाण्याच्या वेळी संशयित सोनटक्के नियमितपणे तिचा पाठलाग करत होता. शाळेच्या बाहेर उभा राहून, “मी तुझ्या बाबांना ओळखतो, माझ्या घरी खूप खाऊ आहे, चल मी तुला पैसे देतो,” असे आमिष दाखवत तो तिला घरी नेण्याचा प्रयत्न करत होता. बिस्किट, गोळ्या, चॉकलेट देण्याचा प्रयत्न करण्यासह वेगवेगळे हावभाव करून अश्लील बोलणे करत विनयभंगही त्याने केला आहे. या त्रासाला कंटाळून मुलीने नुकताच आईला सर्व प्रकार सांगितला. यानंतर आई-वडिलांनी संशयिताचा शोध घेऊन मंगळवारी जाब विचारला, मात्र तो उर्मटपणे बोलला आणि धमक्याही देऊ लागला होता.

संतप्त महिलांना राग अनावर..

अल्पवयीन मुलीबाबत ही घटना कळताच जमलेल्या स्थानिक महिलांनी संशयिताला चांगलाच चोप दिला आहे. अल्पवयीन मुलीशी गैरवर्तन करून उलट धमक्या देणाऱ्या वृद्धाच्या वागण्याने महिलांचा पारा चढला होता. त्यानंतर त्याला पकडून शहापूर पोलिस ठाण्यात हजर केले. पोलिसांनी संशयिताला ताब्यात घेतले असून, पोक्सो कलमांतर्गत कठोर कारवाई सुरू केली आहे. या आधीही परिसरात अशी घटना घडली आहे. फक्त दहा दिवसांत परिसरात अशा प्रकारची दुसरी घटना घडल्याने पालकवर्गात अस्वस्थता आहे.

तात्काळ कठोर कारवाईची मागणी

या घटनेमुळे अल्पवयीन मुलींच्या सुरक्षेचा प्रश्न ऐरणीवर आला आहे. स्थानिक रहिवाशांनी पोलिसांना पत्र लिहून पाठलाग करणाऱ्या संशयितांवर तात्काळ कारवाई करण्याची मागणी केली आहे. शहापूर पोलिसांनी घटनेची सखोल तपास सुरू केला असून, संशयिताच्या मागील पार्श्वभूमीचीही चौकशी करण्यात आली आहे.

दरम्यान पालकांनी लहान मुलामुलींना शाळा किंवा इतर ठिकाणी जाताना एकटे पाठवू नये, असा इशारा पोलिसांनी दिला आहे. या प्रकरणाचा पुढील तपास पोलिसांकडून सुरू आहे.