Ahilyanagar Crime News: श्रीगोंदा तालुक्यात एका मातेने रागाच्या भरात आपल्या बाळाला ब्लँकेटमध्ये गुंडाळून विहिरीत फेकून ठार मारलं. पोलिसांनी अवघ्या एका तासात आरोपी आई सोनाली दळवीला अटक केली असून अधिक तपास केला जात आहे.
मिळालेल्या माहितीनुसार, 27 नोव्हेंबर रोजी दुपारी अचानक आलेल्या फोनवरून पोलिसांना माहिती मिळाली की श्रीगोंदा तालुक्यातील नहेरमळा शिवारातील सुदाम दळवी यांच्या शेतातील विहिरीत एका बाळाचा मृतदेह दिसत आहे. पोलिस निरीक्षक नंदकुमार सोनवलकर यांच्या पथकाने घटनास्थळी धाव घेतली असता 8 महिन्याचा कार्तिक विहिरीत तरंगताना आढळला. गावकऱ्यांच्या मदतीने त्याला बाहेर काढण्यात आले.
थरकाप उडवणारी कबुली
सुरुवातीच्या चौकशीत कार्तिकची आई सोनाली, तसेच चुलती सुषमा आणि चुलता ज्ञानेश्वर यांनी पोलिसांना उडवाउडवीची उत्तरे दिली. त्यामुळे पोलिसांचा संशय वाढला. कठोर चौकशीत आई सोनाली हिनेच खून केल्याची कबुली दिली. ब्लँकेटमध्ये गुंडाळलं आणि विहिरीत टाकलं, अशी थरकाप उडवणारी कबुली नराधम आईने दिली, सोनालीने सांगितले की, सकाळी साडेदहा वाजताच्या सुमारास घरात कोणी नसल्याचे पाहून तिने झोळीत झोपलेल्या कार्तिकला ब्लँकेटमध्ये गुंडाळले आणि रागाच्या भरात थेट विहिरीत फेकून दिले.
फक्त एका तासात पोलिसांचा उलगडा
घटनेची माहिती मिळाल्यानंतर केवळ एका तासात हा गुन्हा उघडकीस आणला. पुढील तपास एपीआय नंदकुमार सोनवलकर करत आहेत.
आई मानसिक तणावात असल्याचा कुटुंबीयांचा दावा
कार्तिकचे वडील योगेश दळवी यांनी सांगितलं की, सोनाली बराच काळ मानसिक तणावात राहत होती आणि किरकोळ कारणांवरून नेहमी चिडचिड करायची. रागाच्या भरातच तिने हे पाऊल उचलल्याचं त्यांनी सांगितलं.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा