मागील अनेक दिवसांपासून मित्रपक्षांमध्ये सुरू असलेल्या धुसफुशीनंतर आता भाजपमधून शिवसेनेत प्रवेश केलेल्या नगरसेवक विकास म्हात्रे यांना खिंडीत गाठण्यासाठी चव्हाण यांनी त्यांच्याच प्रभागात ‘शतप्रतिशत भाजप’चे आवाहन केले.

गेली दहा वर्षे भाजपच्या चिन्हावर निवडणूक लढविणाऱ्या म्हात्रे यांनी चव्हाण यांच्याकडून आपल्याला निधी देण्यात हात आखडता घेतला जात असल्याने प्रभागातील विकासकामे रखडल्याचे सांगत नाराजी व्यक्त केली होती. यानंतर म्हात्रे यांनी शिवसेनेत प्रवेश करताना चव्हाण यांच्यावर थेट आरोप केले होते. यांनतर आता याच भागातील मनसेचे नगरसेवक प्रकाश भोईर, सरोज भोईर यांच्या प्रभागातील विकासकामांचे भूमिपूजन केले. यावेळी बोलताना त्यांनी प्रभागात विकासासाठी निधी दिल्यानंतरही ही कामे जाणीवपूर्वक रखडवल्याचा आरोप केला. ‘ज्याप्रमाणे विधानसभेत भरभरून मतदान करता, त्याप्रमाणे पालिका निवडणुकीत कमळ चिन्हावर निवडणूक लढविणाऱ्या उमेदवाराला मतदान करा आणि हक्काची कामे करून घ्या’, असे सांगत म्हात्रे यांच्यासह शिवसेनेला उघड आव्हान दिले.

आपल्याला १०० टक्के एका विचाराचे म्हणजेच भारतीय जनता पार्टीचे सरकार जे केंद्रात आणि राज्यात आहे तेच आणायचे आहे, असे सांगत पालिका निवडणुकीत महायुती होणार नसल्याचे उघड संकेत दिले. यापूर्वी अनेकदा महापौर भाजपचा म्हणत पदाधिकाऱ्यांनी महायुतीला विरोध केला असताना शिवसेनेने कायमच मवाळ भूमिका घेत महापौर महायुतीचा असेल असे नमूद करून पक्षवाढीवर भर दिला होता. मात्र आता शिवसेनेचे अनेक मोहरे भाजपच्या गळाला लागल्याने दोन्ही पक्ष इरेला पेटले आहेत.

दरम्यान, डोंबिवली पश्चिमेकडील मनसेचे माजी नगरसेवक प्रकाश भोईर आणि सरोज भोईरही लवकरच भाजपच्या घोषणा देतील, असे म्हणत त्यांच्या पक्षप्रवेशाचे चव्हाण यांनी संकेत दिले.