कौटुंबिक वादातून ही आत्महत्या झाल्याची प्राथमिक माहिती आहे. तसंच सासरच्या मंडळींकडून छळ होत असल्याने तिने हे टोकाचं पाऊल उचलल्याचा आरोप गौरी पालवे यांच्या माहेरच्या कुटुंबियांनी केला आहे. या घटनेनंतर पंकजा मुंडे यांनी बीडमधील आपले सर्व कार्यक्रम रद्द केले असल्याचे समजते. याप्रकरणी वरळी पोलिसांनी अपमृत्यूची नोंद केली असून मृतदेह शवविच्छेदनासाठी केईएम रुग्णालयात पाठवला आहे.

नेमकं कारण काय?

अनंत गर्जे आणि डॉक्टर गौरी पालवे यांचा विवाह 7 फेब्रुवारी रोजी मोठ्या थाटामाटात झाला होता. या लग्नाला पंकजा मुंडे आणि माजी खासदार प्रीतम मुंडे देखील उपस्थित होत्या. लग्नाला अवघे 10 महिने पूर्ण होण्याआधीच गौरी यांनी आत्महत्या केल्याने सर्वत्र हळहळ व्यक्त होत आहे. अनंत गर्जे यांचे विवाहबाह्य संबंध असल्याने गौरी अस्वस्थ होत्या, अशी माहितीही समोर येत आहे. याच नैराश्यातून त्यांनी हे पाऊल उचलल्याचा दावा केला जात आहे.

गौरी पालवे या मुंबईतील केईएम रुग्णालयात कार्यरत होत्या. शनिवारी रात्री त्यांनी घरात गळफास घेऊन आत्महत्या केली. या घटनेनंतर पंकजा मुंडे यांनी आपले बीडमधील सर्व नियोजित कार्यक्रम रद्द केले आहेत.

दरम्यान, घटनेबाबतची माहिती मिळताच वरळी पोलिसांनी घटनास्थळी धाव घेऊन मृतदेह ताब्यात घेतला. मृतदेह शवविच्छेदनासाठी केईएम रुग्णालयात पाठवण्यात आला आहे. शवविच्छेदनानंतर या घटनेचे सत्य बाहेर येईल, असं सांगितले जात आहे. याप्रकरणी गुन्हा नोंद करण्याची प्रक्रिया सुरू आहे. तसंच पोलिसांनी कुटुंबियांची चौकशी सुरू केली असून या प्रकरणाचा अधिक तपास सुरू आहे.