महाराष्ट्रानं आतापर्यंत अनेक सरकारं पाहिली आहेत. एका पक्षाची, आघाडी, युतीची सरकारं राज्यात होऊन गेली. पण सत्तेतील एका पक्षाच्या सगळ्या मंत्र्यांनी कॅबिनेटवर बहिष्कार घातल्याचा प्रकार आजतागायत घडला नव्हता. यावरुन शिंदेसेनेतील नाराजीची कल्पना येईल. शिंदेसेनेचे मंत्री कॅबिनेटला गेले नाहीत. पण त्यांनी नंतर मुख्यमंत्री फडणवीस यांची भेट घेतली. पण त्यांनी शिंदे यांच्या मंत्र्यांची कानउघाडणी केली. उल्हासनगरातून सुरुवात तुम्ही केली, याची आठवण फडणवीस यांनी करुन दिली.
श्रीकांत शिंदेच डेंजर झोनमध्ये? शिंदेसेनेला वेगळीच शंका, शहांसोबतच्या भेटीत काय घडलं?
मुख्यमंत्री फडणवीस यांनी शिंदे यांच्या मंत्र्यांना झापलं. त्यानंतर शिंदे यांनी थेट दिल्ली गाठली आणि केंद्रीय अमित शहांची भेट घेतली. शिवसेनेत बंड केल्यावर महाशक्ती आहे पाठीशी असं म्हणणारे शिंदे आता त्याच महाशक्तीकडून मिळणारे दणके सहन करत आहेत. पण महाशक्तीकडे जाण्यावाचून पर्याय नाही. शहांनी शिंदेंना भेटीसाठी वेळ दिली. जवळपास ५० मिनिटं चर्चा केली. पण या भेटीतून शिंदे यांच्या हाती फारसं काही लागलेलं नाही.

२०२९ मध्ये भाजपला महाराष्ट्रात स्वबळावर लढायचं आहे. खुद्द अमित शहांनीच याबद्दलची घोषणा केली आहे. गेल्याच वर्षी त्यांनी आपले इरादे स्पष्ट केले आहेत. महाराष्ट्रात कुबड्यांची गरज लागत नाही, असंही शहा गेल्याच महिन्यात महाराष्ट्रात येऊन सांगून गेले आहेत. त्यामुळे शहा महाराष्ट्र भाजपला आस्ते कदम धोरण स्वीकारायला सांगतील याची सुतराम शक्यता नाही. महाशक्तीच्याच आदेशावरुन प्रदेशाध्यक्ष रविंद्र चव्हाण राज्यात पक्षविस्तार करत आहेत. शिंदेंनी त्यांची तक्रार केल्यानं शहा त्यांना पक्षविस्तार थांबवण्याच्या सूचना देतील, असं होण्याची शक्यता धूसर आहे.
कोट्यवधी मोजून आमचे नगरसेवक फोडले; भाजपच्या बड्या नेत्याची शिंदेंकडून तक्रार, शहांसमोर पाढाच वाचला
उद्धव ठाकरे हिंदुत्वापासून दूर गेल्यानं त्यांची साथ सोडली आणि भाजप सोबत युती केली, असं शिंदे यांनी फुटीनंतर सातत्यानं सांगितलं आहे. त्यामुळे भाजपची साथ सोडणं शिंदे यांच्यासाठी अवघड आहे. त्यातच सत्ता सोडून विरोधी बाकांवर बसणंही कठीण आहे. त्यासाठी किती नेत्यांची तयारी असेल हा प्रश्न आहे. ठाकरेंची साथ सोडताना शिंदेंच्या पाठीशी आमदारांची फौज होती. कारण ते सत्तेतून सत्तेत जात होते. पण सत्तेतून विरोधी बाकावर जाणं आमदारांना अवघड जाईल. त्यातच भाजप सत्तेत असताना विरोधी बाकांवर बसणं सहजसोपं नाही.
नितीश बाबू फडणवीसांसारखे अडून बसले; भाजप शिंदेसेनेच्या भूमिकेत; अलटीपलटी राजकारण चर्चेत
महाविकास आघाडीचं सरकार असताना शिवसेनेचे अनेक आमदार, मंत्री अडचणीत आले. केंद्रीय तपास यंत्रणा अनेकांच्या पाठी लागल्या, हा भूतकाळ ताजा आहे. चौकशा थांबल्या आहेत, त्या बंद झालेल्या नाहीत, याचीही कल्पना शिंदेसेनेच्या नेत्यांना आहे. भाजपला सत्तेपासून दूर ठेवण्याचं धाडस उद्धव ठाकरे, शरद पवार यांनी २०१९ मध्ये केलं. त्यानंतर भाजपनं सुरु केलेल्या हालचाली पाहता आपले पक्ष कधीही फुटू शकतात, याची जाणीव ठाकरे, पवार यांना होती. पण जे होईल ते सहन करायचं या व्यक्तिरिक्त कोणताही पर्याय त्यांच्यापुढे नव्हता. आता शिंदे त्याच वळणावर उभे आहेत. शक्त तितका प्रतिकार करायचा आणि आला दिवस ढकलायचा, हाच शिंदे यांच्या हातात आहे. आधी पाठीशी असलेली महाशक्ती आता पाठीमागे लागलेली आहे.