मुश्रीफ यांचे कट्टर राजकीय प्रतिस्पर्धी, राष्ट्रवादी शरद पवार पक्षाचे नेते समर्जीत घाटगे आणि एकनाथ शिंदेच्या शिवसेनेचे माजी खासदार संजय मंडलिक यांनी कागल आणि मुरगूड नगरपरिषद निवडणुकीसाठी हातमिळवणी करण्याची तयारी दाखवली आहे. या आघाडीवर पुढील दोन दिवसांत अधिकृत शिक्कामोर्तब होण्याची शक्यता आहे. असं झाल्यास मंत्री मुश्रीफांना आपल्याच होम पिचवर सत्ता खेचून आणण्यासाठी अधिक मेहनत करावी लागणार आहे.

Pune Election : पुण्यातील दौंडमध्ये महाविकास आघाडी मैदानात, कुल-कटारिया विरूद्ध थोरात-जगदाळे लढत

विरोधकांची आघाडी तयार

सध्या कागल नगरपरिषदेवर मंत्री मुश्रीफ यांचे वर्चस्व असून, तेथील सत्ता त्यांच्याच कार्यकर्त्यांकडे आहे. मात्र, मंडलिक आणि घाटगे या दोघांच्या राजकीय समीकारणामुळे स्थानिक राजकारणात खळबळ निर्माण झाली आहे. महायुतीमधील स्थानिक नेत्यांमध्येही या नव्या युतीच्या चर्चेला उधाण आले आहे. दोघांची प्राथमिक चर्चा पार पडली असून, ही चर्चा अंतिम टप्प्यात असल्याची माहिती मिळत आहे. त्यामुळे कागलमधील निवडणूक यंदा ऐतिहासिक ठरण्याची शक्यता राजकीय वर्तुळातून व्यक्त केली जात आहे.

बिनविरोध चा प्रस्ताव बारगळला

मुश्रीफ गटाला 11 जागा आणि नगराध्यक्ष पद तर घाटगे गटाला उपनगराध्यक्ष पद आणि 8 जागा अशी समझोता एक्सप्रेस घाटगे आणि मुश्रीफ यांच्यात होणार होती मात्र शाहू समूहाचे प्रमुख समरजीत घाटगे यांनी या प्रस्तावाला नकार देत 23 जागा लढण्याचा निर्णय घेतला, आता कागल आणि मुरगुड नगरपालिकेसाठी घाटगे आणि मंडलिक गट एकत्र येणार असल्याने मुश्रीपांच्या समोर आव्हान उभं राहणार आहे.

मुश्रीफ यांचा भाजपला सूचक इशारा

कोल्हापूर जिल्हा परिषद आणि नगरपरिषदांच्या जागा वाटपावरून हसन मुश्रीफ यांनी भाजपला स्पष्ट शब्दांत इशारा देत म्हटलं की, “भाजप मोठा भाऊ असल्याचा दावा करत असेल, तर सन्मानजनक जागा द्या; अन्यथा आम्ही स्वबळावर लढण्यास तयार आहोत.” त्यांच्या मते, सत्तेच्या समीकरणांमध्ये प्रवेश मिळवण्याची आणि योग्य वेळ साधण्याची कला राष्ट्रवादीला नेहमीच अवगत आहे. “आमच्यातील काही कार्यकर्ते अन्य गटात गेले म्हणून आमची ताकद कमी झाली, असे समजणाऱ्यांचे हे राजकीय गणित चुकल्याशिवाय राहणार नाही,” असंही त्यांनी स्पष्ट केलं.