काँग्रेसच्या गोटातून मोठी बातमी समोर येत आहे. मुंबईत काँग्रेसचं एकदिवसीय शिबिर पार पडलं आहे. या शिबिरात मुंबई महापालिका निवडणुकीबाबत मोठा निर्णय घेण्यात आला आहे. या निर्णयाचा महाविकास आघाडीवर मोठा फरक पडण्याची शक्यता आहे.
काँग्रेसने मुंबईत स्वबळाचा नारा दिला आहे. काँग्रेसचे महाराष्ट्र प्रभारी रमेश चेन्नीथला यांनी मुंबईत काँग्रेस स्वबळावर लढणार असल्याची मोठी घोषणा केली आहे. काँग्रेसचं मुंबईत आज एकदिवशीय शिबिर पार पडलं. आगामी मुंबई महापालिकेच्या निवडणुकीच्या पार्श्वभूमीवर हे शिबिर महत्त्वाचं होतं. या शिबिरनंतर रमेश चेन्नीथला यांनी काँग्रेसची अधिकृत भूमिका स्पष्ट केली.
रमेश चेन्नीथला नेमकं काय म्हणाले?
“मुंबई महापालिका निवडणुकीत काँग्रेस स्वबळावर लढणार आहे. काँग्रेस मुंबईतील संपूर्ण 222 जागांवर निवडणूक लढेल. आमच्या जिल्हा काँग्रेस कमिटी आणि सर्व पदाधिकाऱ्यांची स्वबळावर स्वतंत्र निवडणूक लढण्याची इच्छा आहे. त्यामुळे आम्ही एकत्र निवडणूक लढण्याचा निर्णय घेतला आहे”, अशी महत्त्वाची प्रतिक्रिया रमेश चेन्नीथला यांनी दिली आहे.
वर्षा गायकवाड यांचं मोठं वक्तव्य
काँग्रेस खासदार वर्षा गायकवाड यांनी मनसेसोबत युती करणार का? अशा प्रश्नावर मोठं उत्तर दिलं आहे. मारहाणीची भाषा आमच्या सुसंस्कृत पक्षाला धरुन नाही, असं वक्तव्य वर्षा गायकवाड यांनी केलं आहे. त्यांच्या या वक्तव्याला शिवसेना उद्धव बाळासाहेब ठाकरे पक्षाच्या नेत्या किशोरी पेडणेकर यांनी प्रतिक्रिया दिली आहे. बिहारच्या निवडणुकीतील ऱ्हासानंतरही काँग्रेस असा निर्णय घेत आहे, असं किशोरी पेडणेकर म्हणाल्या आहेत.
वर्षा गायकवाड नेमकं काय म्हणाल्या?
“आम्ही मुंबईत सातत्याने विकासावर बोलणारी मंडळी आहोत. आम्ही मुंबईकरांचा त्रास रोज बघत आहोत. म्हणून एक अपेक्षा करत होतो की, मुंबईत सगळ्यांनी एकत्र येऊन बोललं पाहिजे. कारण मुंबई ही महाराष्ट्राची राजधानी आहे. पण काही राजकीय पक्षांच्या माध्यमातून सातत्याने जी मारहाण केली जाते किंवा कायदा-व्यवस्था आपल्या हातात घेतली जाते, जी भाषा वापरली जाते ती आमच्या सुसंस्कृत पक्षाला धरुन नाही. तुम्ही विचारताय की, X Y Z पक्षासोबत तुम्ही जाणार आहात का? आमची महाविकास आघाडीत नेहमी भूमिका राहिलेली आहे की, कॉमन मिनिमम प्रोग्राम झाला पाहिजे”, असं वर्षा गायकवाड म्हणाल्या आहेत.
किशोरी पेडणेकर काय म्हणाल्या?
“आता ह्यांच्या नेत्यांनी बिहारमध्ये झालेला ऱ्हास पाहूनही त्यांना वाटत असेल की, अशा पद्धतीने जावं. तर त्यांना कुणी थांबवू शकत नाही. त्यांचे वरिष्ठच थांबवू शकतात. पक्षाचे प्रमुख जे निर्णय घेत आहेत त्यांना तो निर्णय योग्य वाटत आहे का? हा मुख्य प्रश्न आहे. त्यांना लवकरच कळेल”, अशी प्रतिक्रिया किशोरी पेडणेकर यांनी दिली.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा