हा किस्सा सांगताना उपमुख्यमंत्री म्हणाले की “आम्ही एका ठिकाणी जात होतो. अचानक एक व्यक्ती माझ्या गाडीसमोर आला आणि थेट कट मारून पुढे गेला. मी लगेच मागून त्याच्या गाडीचा पाठलाग करण्यास सांगितले, पण तो दुसऱ्या रस्त्याने वळून गेला”, असा किस्सा अजित पवार यांनी सांगितला.

एकनाथ शिंदेंनी मंत्री, आमदार, खासदारांना कामाला लावलं; नगरपंचायत- नगरपरिषद निवडणूक प्रभारींची मोठी यादी जाहीर

त्यांनी पुढे सांगितले की, “यानंतर मी तातडीने पोलिसांना निर्देश दिले त्याला पकडा, पाहू कोण आहे तो. पोलिसांनी काही वेळातच त्या वाहनचालकाला पकडले. चौकशीत त्याने सांगितले की, मी घाबरलो होतो, म्हणून थांबलो नाही.”

या घटनेच्या निमित्ताने अजित पवार यांनी पोलिसांना स्पष्ट सूचना दिल्या की, वाहतूक नियमांचे उल्लंघन करणाऱ्यांवर कठोर कारवाई केली पाहिजे. नियम मोडणाऱ्यांना शिक्षा झालीच पाहिजे. यावेळी त्यांनी नागरिकांनाही आवाहन केले की, वाहतुकीचे नियम पाळा, जबाबदारीने वाहनं चालवा आणि अपघात टाळा. बारामतीतल्या कार्यक्रमातील या किस्स्याने उपस्थितांमध्येही चांगलीच चर्चा रंगली.

उपमुख्यमंत्री अजित पवार यांच्या उपस्थितीत आज बारामतीतील राष्ट्रवादी काँग्रेस भवन येथे बारामती नगर परिषद निवडणुकांच्या पार्श्वभूमीवर मुलाखती घेण्यात आल्या. मुलाखती पार पडल्यानंतर अजित पवारांनी कार्यकर्त्यांचा एक छोटासा मेळावा घेतला.

या मेळाव्यात नगराध्यक्ष पदाचे नाव घोषित करतील अशी अपेक्षा बारामतीकरांना होती, मात्र अजित पवारांनी त्यांची पवार शैली खेळी करत नाव गुलदस्त्यात ठेवलं आहे. त्यामुळे आता बारामतीतला नगराध्यक्ष पदाचा उमेदवार कोण असणार, हे स्पष्ट व्हायला आणखी वाट पाहावी लागणार आहे.