Phaltan Doctor Death Case: फलटण उपजिल्हा रुग्णालयातील डॉक्टर तरुणीच्या आत्महत्येप्रकरणी निलंबित उपनिरीक्षक गोपाळ बाळासाहेब बदने याच्यावर कठोर कारवाई करण्यात आली आहे. तरुणीने आत्महत्येपूर्वी तळहातावर लिहिलेल्या सुसाईड नोटमध्ये बदनेवर अत्याचाराचा आरोप केला होता.
मृत तरुणीच्या कुटुंबीयांनी असा आरोप केला आहे की, पोलिसांकडून अटक करण्यात आलेल्या आरोपींना ‘फिट-अनफिट’ दाखवण्यासाठी आणि मृतांचे शवविच्छेदन अहवाल बदलण्यासाठी डॉक्टर तरुणीवर दबाव टाकला जात होता. या प्रकरणी मुख्य संशयित उपनिरीक्षक गोपाल बदने याला आधी निलंबित करण्यात आले होते. आता त्याला पोलीस सेवेतून कायमचं काढून टाकण्यात आलं आहे.
सातारचे पोलीस अधीक्षक तुषार दोशी यांनी या संदर्भात माहिती दिली. त्यांनी सांगितलं की, फलटण शहर पोलीस ठाण्यात दाखल असलेल्या गु. र.नं. ३४५/२०२५ या गुन्ह्यातील आरोपी गोपाळ बाळासाहेब बदने याने पोलीस दलाचे ज्ञान असूनही बेफिकिरीने, नैतिक अधःपतन, दुर्वर्तन आणि पदाचा गैरवापर केला. तसंच समाजात असुरक्षिततेची भावना निर्माण करणारी वर्तणूक केली. त्याचे कृत्य पोलीस उपनिरीक्षक पदाला अशोभनीय होते. त्याने कर्तव्य पालनात आणि दैनंदिन जीवनात संशयास्पद वर्तन केलं. त्याचे कृत्य अत्यंत घृणास्पद आणि निंदनीय आहे. त्यामुळे गोपाळ बाळासाहेब बदने याला शासकीय सेवेत ठेवणे योग्य नाही, असं मत त्यांनी व्यक्त केलं.
दरम्यान, निलंबित पोलीस उपनिरीक्षक गोपाळ बाळासाहेब बदने (ज्याची नेमणूक फलटण ग्रामीण पोलीस ठाण्यात होती) याला कोल्हापूर परिक्षेत्राचे विशेष पोलीस महानिरीक्षक सुनील फुलारी यांनी भारतीय राज्यघटना १९५० मधील अनुच्छेद ३११ (२) (ब) नुसार ४ नोव्हेंबर २०२५ पासून ‘शासकीय सेवेतून बडतर्फ’ केलं आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा