पुण्यात दहशतवाद विरोधी पथकाने एका संशियताला काही दिवसांपूर्वी अटक केली. एटीएसकडून त्याची चौकशी सुरु आहे. जुबेर हंगरगेकर असं या संशयित आरोपीचं नाव आहे. त्याची पोलीस कोठडी वाढवण्यात आली आहे. त्याला अटक केल्यानंतर त्याच्या साथीदारांनी काही कागदपत्रे जाळल्याची माहिती समोर आली आहे.
जुबेरच्या या साथीदाराला ताब्यात घेऊन ‘एटीएस’च्या तपास पथकाने काळेपडळ येथील मदरशाच्या मोकळ्या जागेचा पंचनामा करत काही अर्धवट जळालेली कागदपत्रे ताब्यात घेतली. या ठिकाणच्या ‘सीसीटीव्ही’ चित्रीकरणामध्येही जुबेरचा साथीदार एका रिक्षातून येऊन कागदपत्रे जाळत असल्याचे निदर्शनास आले आहे. याबाबत, सात साक्षीदारांकडे तपास करण्यात आला आहे. याशिवाय जुबेर व त्याचे साथीदार कौसरबागेतील एका इमारतीच्या तळघरातील मदरशात (मकतब) एकत्रित यायचे. तपास अधिकाऱ्यांनी या ठिकाणचा पंचनामा केला असून, सीसीटीव्ही चित्रीकरण ताब्यात घेतले आहे.
‘अल कायदा इन इंडियन सबकाँटिनेन्ट’ (एक्यूआयएस) या दहशतवादी संघटनेच्या समर्थनार्थ जिहादचा प्रसार-प्रचार करून देशाच्या एकता व सुरक्षिततेला धोका निर्माण केल्याच्या आरोपावरून जुबेर इलियास हंगरगेकर (वय ३७, रा. कोंढवा) याला ‘एटीएस’ने २७ ऑक्टोबर रोजी अटक केली. त्याला पोलिस कोठडीची मुदत संपल्याने मंगळवारी दुपारी विशेष न्यायाधीश एस. आर. साळुंखे यांच्या न्यायालयात हजर करण्यात आले. त्या वेळी त्याच्या पोलिस कोठडीत वाढ करण्याची मागणी विशेष सरकारी वकील विजय फरगडे व तपास अधिकारी सहायक आयुक्त अनिल शेवाळ यांनी केली. न्यायालयाने ती मान्य केली.
या मुद्द्यांवर होणार तपास
- जुबेरच्या मोबाइल व लॅपटॉपमधील मोठ्या प्रमाणात असलेल्या डेटाचे विश्लेषण सुरू.
- त्यातून मिळालेल्या पीडीएफ फाइल व चॅटिंगमध्ये काही सांकेतिक भाषेचा व शब्दांचा वापर असल्याची शक्यता.
- आरोपीच्या जवळच्या साथीदाराच्या घरातून २ लाख ३५ हजार रुपये हस्तगत. ही रक्कम कोणाकडे, कशासाठी जाणार होती?
- आरोपीच्या साथीदारांनी कोणती पुस्तके, कागदपत्रे जाळली?
- आरोपीने कोंढव्यातील मशिदीत ‘क्यूआर कोड’ लावून स्वतःच्या खात्यावर पैसे घेतले. या खात्यांचे ‘फॉरेन्सिक ऑडिट’ सुरू.
- आरोपी धार्मिक विषयांवर प्रश्नमंजुषा घेऊन विद्यार्थ्यांना लॅपटॉप, टॅब, स्मार्टवॉच अशी बक्षीसे द्यायचे. त्यातून किती तरुण मुले त्यांच्या संपर्कात आली?
आरोपीच्या ‘कॉन्टॅक्ट लिस्ट’मध्ये पाच जण परदेशातील
आरोपी जुबेर हंगरगेकरचा जुना मोबाइल त्याच्या साथीदाराच्या घरातून जप्त करण्यात आला असून, त्यामध्ये पाकिस्तान, सौदी अरेबिया, कुवेत व ओमानमधील पाच व्यक्तींचे संपर्क क्रमांक आहेत; तर तो वापरत असलेल्या मोबाइलमध्ये ओमान व सौदी अरेबियातील पाच व्यक्तींचे संपर्क क्रमांक आढळून आले आहेत. त्याबाबत चौकशी केली असता, आरोपी जाणूनबुजून माहिती देत नसल्याचे तपास अधिकाऱ्यांनी न्यायालयाला सांगितले.
पुण्यानंतर अहिल्यानगरात जैन समाजाच्या जागेचा वाद पेटला, रवींद्र धंगेकर धर्मादाय आयुक्तांना भेटणार
जुबेरचे काही साथीदार ‘सिमी’चे जुने सदस्य
जुबेरच्या जवळचे साथीदार असलेल्या १८ जणांचे जबाब नोंदविण्यात आले आहेत. त्यापैकी अकरा जण ४५ वर्षापुढील वयोगटातील आहेत; तर काही जण केंद्र सरकारने बंदी घातलेल्या ‘सिमी’ (स्टुडंट्स इस्लामिक मूव्हमेंट ऑफ इंडिया) या संघटनेचे जुने सदस्य असून, काही जणांविरोधात बेकायदा हालचाली प्रतिबंधक कायद्यानुसार (यूएपीए) गुन्हे दाखल आहेत. त्याचा एक साथीदार शिक्षा भोगून आला असून, अन्य काही साथीदार तपास यंत्रणेच्या रेकॉर्डवरील संशयित आहेत.महिला डॉक्टरवर स्वत:ला कोंडून घेण्याची आली वेळ, डोंबिवलीच्या सरकारी रुग्णालयात काय घडलं?
झोप मिळत नसल्याची जुबेरची तक्रार
न्यायालयाने पोलिसांविरुद्ध काही तक्रार आहे का, अशी विचारणा जुबेरला केली. त्यावर, तपास अधिकारी माझ्याकडे सतत तपास करत असल्याने मला पूर्णवेळ झोप मिळत नाही; त्यामुळे माझ्या आरोग्यावर विपरीत परिणाम होऊ लागला आहे, अशी तक्रार जुबेरने केली. त्यावर आरोपीकडे तपास करताना त्याला आवश्यक असलेली झोप मिळू द्या, असे निर्देश न्यायालयाने तपास अधिकाऱ्यांना दिले.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा