पोलिसांना गुप्त माहिती मिळाली की जुनी पिंप्राणी गावात गांजाची लागवड केली जात आहे. या माहितीच्या आधारे, म्हसावद पोलीस ठाण्याच्या हद्दीतील जुनी पिंप्राणी गावात पथक पोहोचले. संशयित आरोपी सुरत्या ऊर्फ सुरसिंग डुगर्या पाडवी याच्या घरी तपासणी केली असता, तो घरी मिळून आला नाही. मात्र, त्याच्या घराशेजारील शेताची पाहणी केली असता, तिथे कापसाच्या पिकात गांजाची झाडे लावलेली दिसली.

Raigad News: ‘मारहाण करणाऱ्यांना अटक करा, नाहीतर..’; मनसेच्या बड्या नेत्याचा इशारा, महाडमध्ये मनसे- शिंदे गट संघर्ष शिगेला

पोलिसांनी तातडीने कारवाई करत त्या ठिकाणाहून एकूण ९८ किलो ३४७ ग्रॅम वजनाचा गांजा जप्त केला. या गांजाची किंमत ९ लाख ८३ हजार ४७० रुपये इतकी आहे. हा गांजा मानवी मेंदूवर विपरीत परिणाम करणारा असून, त्याचे सेवन करणे कायद्याने गुन्हा आहे.

संशयित आरोपी सुरत्या ऊर्फ सुरसिंग डुगर्या पाडवी, रा. जुनी पिंप्राणी, पोस्ट रामपूर, ता. शहादा याने आपल्या शेतात कापसाच्या पिकात गांजाची बेकायदेशीर लागवड केली होती. स्वतःच्या फायद्यासाठी त्याने हा अंमली पदार्थ पिकवला होता. या प्रकरणी म्हसावद पोलीस ठाण्यात गुंगीकारक औषधी द्रव्य व मनोव्यापारावर परिणाम करणारे पदार्थ अधिनियम-१९८५ च्या कलम २० (अ) (ब), २२ (क) नुसार गुन्हा दाखल करण्यात आला आहे.

ही यशस्वी कारवाई नंदुरबार जिल्ह्याचे पोलीस अधीक्षक श्रवण दत्त. एस. आणि अपर पोलीस अधीक्षक आशित कांबळे यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, उपनिरीक्षक मुकेश पवार, उपनिरीक्षक विकास गुंजाळ, असई राकेश वसावे आणि इतर पोलीस कर्मचाऱ्यांनी केली. या कारवाईमुळे अंमली पदार्थांच्या तस्करीला आळा बसण्यास मदत होईल अशी अपेक्षा आहे.