विविध योजनांचा निधी देण्यात भाजप आणि शिवसेना पक्षातील मंत्री हात आखडता घेत असून, त्याचा फटका आगामी निवडणुकांमध्ये बसण्याची शक्यता या वेळी नेत्यांनी उघडपणे बोलून दाखवली. या तक्रारींची गंभीर दखल घेऊन, महायुतीच्या समन्वय समितीच्या बैठकीत चर्चा करण्याचे आश्वासन नेत्यांना देण्यात आले.
Uddhav Thackeray: …ही तर निवडणूक आयोगाची भुताटकी; मतदार नोंदणीच्या मुद्द्यावरुन उद्धव ठाकरेंची टीका
राष्ट्रवादी काँग्रेसतर्फे वरळी डोम येथे जिल्हावार बैठकांचे आयोजन करण्यात येत आहे. बैठकांच्या पहिल्या दिवशी मराठवाड्यातील (धाराशिव वगळून), तसेच सिंधुदुर्ग जिल्ह्याचा सविस्तर आढावा घेण्यात आला. या वेळी पक्षाचे जिल्हाध्यक्ष आणि इतर पदाधिकाऱ्यांनी पक्षाच्या जिल्ह्यातील सद्यस्थितीविषयी माहिती देऊन, सविस्तर अहवाल सादर केला. परंतु, यापैकी काही नेत्यांनी महायुतीमध्ये मिळत असलेल्या सापत्न वागणुकीविषयी तीव्र शब्दांत नाराजी व्यक्त केली.

भाजप आणि शिवसेनेतील मंत्री मतदारसंघात निधी देताना हात आखडता घेत असल्याची तक्रारही या वेळी करण्यात आली. निधीअभावी कामे रखडल्याने आगामी निवडणुकांत त्याचा फटका बसण्याची शक्यताही नेत्यांनी वर्तवली.

महायुतीच्या बैठकीत मुद्दा मांडणार
राष्ट्रवादी काँग्रेसचे प्रदेशाध्यक्ष सुनील तटकरे यांनी तक्रारीची नोंद घेतल्याचे स्पष्ट केले. काही जिल्ह्यातील नेत्यांनी याविषयीच्या तक्रारी केल्या असल्या, तरी सर्वत्र असे चित्र नाही. महायुतीच्या समन्वय समितीची बैठक मंगळवारी सहा वाजता होणार असून, त्यामध्ये महायुतीबाबतचे धोरण ठरविण्यात येईल, तसेच नेत्यांच्या तक्रारीचा विषयही मांडण्यात येईल, असेही त्यांनी स्पष्ट केले.