डॉ. विखे यांनी स्पष्ट शब्दांत म्हटलं की, “मागच्या एका वर्षात मी केलेल्या कामाच्या दोन टक्के कामही सध्याचे लोकप्रतिनिधी करू शकले नाहीत.” या वक्तव्यातून त्यांनी नाव न घेता खासदार निलेश लंके यांच्यावर अप्रत्यक्ष निशाणा साधला. “मी पराभूत झालो तरी खचलो नाही, कारण जनतेला काही लोकांच्या भरोशावर सोडणे योग्य नाही. आपण थांबलो तर जनतेकडे कोण पाहणार? आम्ही सेवेसाठी काम करतच राहणार,” असेही त्यांनी स्पष्ट केले.

Uddhav Thackeray: पुराव्यांनिशी आता न्यायालयात जाणार; ‘सत्याचा मोर्चा’मध्ये उद्धव ठाकरे यांची घोषणा

कामाची जाहिरात केली नाही

आपल्या कार्यकाळाचा आढावा घेताना डॉ. विखे म्हणाले, “आमचे सर्वात मोठे दुर्भाग्य हे की आम्ही केलेल्या कामाची जाहिरात कधी केली नाही. जे दाखवलं जातं त्यावर विश्वास ठेवू नका; माणूस ओळखायला शिका. योग्य माणूस ओळखायला शिकलात, तर पुढच्या 25 वर्षांसाठी तुमच्या मुलांचं भविष्य सुरक्षित होईल.”

आरोग्य क्षेत्रातील विकासाबाबत बोलताना त्यांनी ‘पुण्यश्लोक अहिल्यादेवी होळकर वैद्यकीय महाविद्यालय’ नगरमध्येच स्थापन होणार असल्याची खात्री दिली. “काही लोक फक्त राजकारणासाठी मुद्दे निर्माण करतात, पण महाविद्यालय कुठे जाणार नाही; ते नगरमध्येच राहणार आहे. पालकमंत्री राधाकृष्ण विखे पाटील आणि आमदार संग्राम जगताप यांच्या पाठबळामुळेच हे शक्य होणार आहे,” असे त्यांनी सांगितले.

माणसाची ओळख कर्तृत्वामुळे होते

स्वतःच्या राजकीय प्रवासाबद्दल बोलताना डॉ. विखे म्हणाले, “माझा संघर्ष वैयक्तिक नाही. खासदारपदावर असताना काही जण माझं काम कमी लेखत होते, पण आज संपूर्ण महाराष्ट्र मला ओळखतो, हे जनतेच्या आशीर्वादामुळेच शक्य झालं. माणसाची ओळख पदामुळे नाही, तर कर्तृत्वामुळे होते.”

शेवटी विरोधकांना इशारा देत त्यांनी म्हटलं, “आज जर निवडून दिलेले आणि पराभूत प्रतिनिधी रस्त्यावर उभे राहिले, तर जनतेची गर्दी कोणाकडे जास्त असेल हे सर्वांना माहिती आहे. जनतेला आता समजलं आहे की काम कोण करतं आणि विकास कोण घडवतो. आम्ही फक्त विकासासाठीच काम करणार.”