मिळालेल्या माहितीनुसार, मिनी बस चालकाला झोप लागल्यामुळे बस साईड बॅरिकेटला जोरदार धडकली, अशी प्राथमिक माहिती पोलीस तपासात मिळाली आहे. अपघाताची घटना 01 नोव्हेंबर रोजी पहाटे घडली आहे. दहिवलीहून एम एच-४६, ए एच-०७६७ क्रमांकाची ही बस होती. या मिनी बसच्या अपघाताची घटना कर्जत बोगद्याजवळ घडली आहे. पोलीस कंट्रोल रूम आणि सुरक्षा रक्षकांनी तात्काळ घटनास्थळी धाव घेत मदतकार्य सुरु केल्यानंतर सर्वांना हॉस्पिटलमध्ये दाखल करण्यात आले.

Raj Thackeray: दुबार-तिबारवाले मतदार आढळल्यास तिथेच फोडून काढा, राज ठाकरेंचा हल्लाबोल; म्हणाले, ‘बडव-बडव बडवायचे आणि…’

या अपघातात सुरेखा लाड, नंदकुमार मोरे आणि राजेश विश्वनाथ लाड हे प्रवासी गंभीर जखमी झाले असून, त्यांना इगतपूरी ग्रामीण रुग्णालयात दाखल करण्यात आले आहे. मृत चालक दत्ता ढाकवळ कर्जत ढाक येथील रहिवासी असून, तो सध्या कुशिवली गावात वास्तव्यास होता. त्याच्या अकाली निधनाने कुटुंबासह मित्रपरिवारात शोककळा पसरली आहे.

दरम्यान, हे सर्व प्रकरण कसं घडलं याचा तपास इगतपूरी पोलीस करत आहेत. या भयावह अपघातामुळे संबंधित मार्गावर काही वेळ वाहतूक ठप्प झाली होती. ती हळू हळू सुरु झाली, तर प्रवाशांनी सुरक्षिततेसाठी दक्ष राहण्याचे आवाहन पोलिसांनी यावेळी केले आहे. या अपघाताच्या प्रकाराने सार्वजनिक वाहनांची वाहतूक आणि सुरक्षेचा प्रश्न पुन्हा एकदा उभा राहिला आहे.

तसेच चालकांच्या थकव्यामुळे होणाऱ्या अपघातांची गंभीरताही पुन्हा एकदा अधोरेखित झाली आहे. पोलीस आणि प्रशासन पुढील उपाययोजना करत असून, प्रवाशांच्या सुरक्षिततेसाठी योग्य ती खबरदारी घेतली जाणार आहे.