हा मोर्चा दुपारी १ वाजता फॅशन स्ट्रीट येथून सुरू होऊन मेट्रो सिनेमा मार्गे मुंबई महापालिका मुख्यालयाजवळ पोहोचेल. ‘१ नोव्हेंबर रोजी मुंबईत मतचोरी आणि मतदार यादीतील घोटाळ्यांबाबत निवडणूक आयोगाच्या विरोधात सर्वपक्षीय सत्याचा विराट मोर्चा आयोजित केला आहे. लोकशाहीच्या संवर्धनासाठी सर्व मतदारांनी या मोर्चात सहभागी व्हावे,’ असे राष्ट्रवादी काँग्रेस (शप) पक्षाचे जयंत पाटील यांनी आवाहन केले आहे.

Raj Thackeray : आय लव्ह यू राज साहेब! दादर स्टेशनवर ऑटोग्राफ घेत तरुणाचे उत्स्फूर्त शब्द, राज ठाकरेंची प्रतिक्रिया काय?
मात्र, या मोर्चाला अद्याप पोलिसांची परवानगी मिळालेली नाही. विनापरवानगी मोर्चा काढल्यास पोलिसांकडून कायदेशीर कारवाई होईल, अशी माहिती समोर आली आहे. त्यामुळे मोर्चा आयोजकांवर गुन्हा दाखल होण्याची शक्यता व्यक्त केली जात आहे.

या पार्श्वभूमीवर मनसेचे ज्येष्ठ नेते बाळा नांदगावकर यांनी प्रतिक्रिया दिली. “लोकशाही टिकवण्याची पहिली सुरूवात मुंबईत या मोर्चासोबत होत आहे. पोलिसांनी काहीही कारवाई केली तरी आम्ही त्याला सामोरे जाण्यास तयार आहोत. परवानगी मिळाली नाही तरी आम्ही मागे हटणार नाही; हा मोर्चा होणारच,” असे त्यांनी ठामपणे सांगितले.

नांदगावकर यांनी पुढे सांगितले की, “पोलिसांसोबत झालेल्या बैठकीत त्यांनी सकारात्मक भूमिका घेतली होती. तरीही अद्याप परवानगी का दिली नाही, हा प्रश्न कायम आहे. पाऊस असो वा काहीही झाले तरी मोर्चा काढणार,” असेही त्यांनी स्पष्ट केले.

या मोर्चात उद्धव ठाकरे, राज ठाकरे, बाळासाहेब थोराट आणि हर्षवर्धन सपकाळ यांची भाषणे होणार आहेत. दरम्यान, राज ठाकरे सध्या मोर्चासाठी पश्चिम रेल्वेने प्रवास करत असून दादर ते चर्चगेट या मार्गावर प्रवास सुरू आहे. मनसैनिकांनाही गर्दी टाळण्यासाठी लोकलने प्रवास करण्याचे आवाहन करण्यात आले आहे.