डॉक्टर तरुणीच्या आत्महत्येवरून होत असलेल्या वादावर दिलीप भोसले म्हणाले की, “हत्या हा शब्द चुकीचा आहे. ही हत्या नाही. या प्रकरणात हत्या हा शब्द फक्त सुषमा अंधारे यांनीच वापरला आहे. पीडित डॉक्टर तरुणी या आमच्या हॉटेलवर रात्री दीड वाजता आल्या आणि त्यांनी मला रूम हवी आहे, असं वॉचनमनला सांगितलं. मला उद्या बारामतीला जायचं आहे, पण एवढ्या रात्री आता बारामतीला जाणं शक्य नाही. त्यामुळे तुम्ही मला रूम द्या, असं त्या म्हणाल्या,” अशी माहिती भोसले यांनी दिली आहे.

दरम्यान, “डॉक्टर रूमममध्ये गेल्यानंतर दुसऱ्या दिवशी सकाळी 9 वाजेपर्यंत झोपेतून उठल्या नाहीत, संध्याकाळी 5 वाजल्या तरी उठल्या नाहीत. त्यामुळे संशय आल्यानंतर आम्ही पोलीस प्रशासनाला फोन केला आणि आमच्याकडे जी एक्स्ट्रा चावी असते, त्याने दरवाजा उघडला. दरवाजा उघडताच मॅडम आम्हाला लटकलेल्या अवस्थेत दिसल्या. त्यांनी स्वत:च्या ओढणीने गळफास घेतला होता. आमच्या मॅनेजरने ते दृश्य पाहताच पुन्हा दार बंद केलं आणि पुन्हा पोलीस येण्याची वाट पाहिली,” असा दावाही हॉटेलमालक दिलीप भोसलेंनी केला आहे.

“सर्व प्रक्रिया पूर्ण केल्यानंतरच दिली रूम”

“तरुणी आमच्याकडे रूम मागण्यासाठी आल्यानतर सर्व प्रक्रिया पूर्ण केल्यानंतर तिला रूम देण्यात आली. त्यानंतर कोणीच रुममधून बाहेर आलं नाही. ज्यावेळेस डॉक्टर तरुणी हॉटेलमध्ये आली त्यावेळेस ती काहीशी पॅनिक वाटत होती. त्यांना गाडीही आत घेता आली नाही. आमच्या वॉचमनने गाडी आतमध्ये घेतली,” असंही भोसले यांनी म्हटलं आहे.

दरम्यान, “मी गेल्या 35 वर्षांपासून फलटण शहरात काम करत आहे. लोकांची सेवा करण्यासाठी राजकारणात जायला हवं आणि आता नगरपालिका निवडणुकीच्या निमित्ताने मला ती संधी निर्माण झाल्यामुळे काही लोकांनी मला अडचणीत आणण्यासाठी जाणीवपूर्वक या प्रकरणात माझ्यावर आरोप केले जात आहेत,” असा दावा दिलीप भोसले यांच्याकडून करण्यात आला आहे.