मिळालेल्या माहितीनुसार, राष्ट्रवादी शरदचंद्र पवार पक्षाचे आमदार एकनाथ खडसे यांचा जळगाव शहरात शिवराम नगर भागात बंगला आहे. या ठिकाणी ते वास्तव्यास असतात. मात्र दिवाळी सणानिमित्त ते कुटुंबासह बाहेर फिरायला गेलेले असताना त्यांच्या बंगल्याचा सुरक्षारक्षकही सणाच्या सुट्टीमुळे गावाला गेला होता. त्यामुळे घराला कुलूप होते. हीच संधी साधत चोरट्यांनी मध्यरात्री मुख्य दरवाजाचे कुलूप तोडून घरात प्रवेश केला.

चोरट्यांनी घरात असलेली रोख रक्कम आणि सोन्याचे दागिने घेऊन पळ काढला. सकाळी ही बाब आजूबाजूच्या रहिवाशांच्या लक्षात आल्यानंतर त्यांनी तात्काळ फोन करून घटनेसंदर्भात माहिती दिली. त्यानंतर तपासासाठी पोलीस खडसे यांच्या घरी दाखल झाले आणि स्थानिक गुन्हे शाखेची काही पथके चोरांच्या मागावर रवाना करण्यात आली असल्याची माहिती आहे.

Thane Crime: ‘मी तुला सोडणार नाही’, 17 वर्षीय तरूणाचा गर्लफ्रेंडसोबत वाद; रागाच्या भरात केले असे काही…

खडसे काय म्हणाले?

“जळगाव शहरातील शिवम नगर भागात माझा बंगला आहे. दिवाळीनिमित्त वॉचमन त्याच्या गावी गेलेला आहे आणि त्या घराला सध्या कुलूप होते. मी देखील बाहेरगावी होतो. घरात माझ्या लॉकरमध्ये 35 हजार रुपये रोख रक्कम होती. काही पाच-पाच ग्रॅमच्या दोन अंगठ्या होत्या आणि एकूण सात ते आठ तोळे सोने होते. ही रोख रक्कम आणि सोन्याचे दागिने चोरी करण्यात आले आहेत,” अशी माहिती एकनाथ खडसेंनी दिली आहे.

दरम्यान, गेल्या महिन्यात केंद्रीय राज्यमंत्री रक्षा खडसे यांच्या मुक्ताईनगर येथील पेट्रोल पंपावर रात्री 11 वाजेच्या सुमारात दरोडा टाकण्यात आला होता. तिथंही दरोडेखोरांनी सामानाची तोडफोड करून एक लाख रुपये मुद्दल लंपास केली होती. या घटनेला एक महिना होत नाही तोच आता एकनाथ खडसे यांच्या जळगाव शहरातील बंगल्यात मध्यरात्री चोरट्यांनी चोरी करून रोख रक्कम आणि सात ते आठ तोळे सोने लंपास केले आहे.