जेव्हीएलआर ते कफ परेड या भुयारी मेट्रो-3कडे अधिकाधिक प्रवाशांना आकर्षित करण्यासाठी मुंबई मेट्रो रेल कॉर्पोरेशन लिमिटेड (एमएमआरसीएल) आणि मुंबई महापालिकेने प्रयत्न सुरू केले आहेत. याच प्रयत्नांचा भाग म्हणून मोठमोठी व्यावसायिक, रहिवासी संकुले भुयारी पादचारी मार्गांनी मेट्रो-3ला जोडण्यात येणार आहेत. त्याबाबतच्या आठ प्रस्तावांना मुंबई महापालिकेने मंजुरी दिली आहे. पहिल्या टप्प्यात तीन स्थानके अशा प्रकारे प्रवासीसुलभ करण्यात येणार आहेत. मुंबई महापालिकेतील एका वरिष्ठ अधिकाऱ्याने याबाबत माहिती दिली.

भूयारी पादचारी मार्ग

भुयारी पादचारी मार्गाचे काम एमएमआरसीएलकडून केले जाणार आहे. महालक्ष्मी रेसकोर्सवर सेंट्रल पार्क तयार झाल्यानंतर मुंबईकरांसह पर्यटकांना तिथपर्यंत सहज जाता यावे, यासाठी महालक्ष्मी रेसकोर्स ते नेहरू सायन्स सेंटरपर्यंत भूमिगत पादचारी मार्ग तयार करण्यात येणार आहे. हा साधारण एक किमीपेक्षा जास्त किमीचा पादचारी मार्ग असेल. याच धर्तीवर मेट्रो-3च्या अन्य स्थानकांशीही भूमिगत पादचारी मार्ग जोडण्याबाबत जुलैमध्ये मुंबई महापालिका मुख्यालयात झालेल्या बैठकीत चर्चा करण्यात आली होती. मुंबई महापालिका आयुक्त भूषण गगराणी, एमएमआरसीएलच्या व्यवस्थापकीय संचालक अश्विनी भिडे (अतिरिक्त कार्यभार), नगरविकास विभागाचे अतिरिक्त मुख्य सचिव असीम गुप्ता यांच्यासह एमएमआरडीए आणि रेल्वेचे अधिकारी यावेळी उपस्थित होते.

महापालिकेची प्रस्तावाली मंजुरी

भूमिगत पादचारी मार्ग कसे जोडता येतील, त्यासाठी लागणारा चटई क्षेत्र निर्देशांक यांसह अन्य मुद्द्यांवर या बैठकीत चर्चा झाली. त्यानंतर मेट्रो-3 मार्गावरील जेव्हीएलआर ते कफ परेडदरम्यानची वरळी, वांद्रे-कुर्ला संकुल, अंधेरी एमआयडीसी ही तीन स्थानके मुंबईतील बड्या व्यावसायिक आणि मुंबईतील निवासी संकुलांना मेट्रो-3 शी जोडण्यासाठी भुयारी पादचारी मार्गाचा प्रस्ताव तयार झाला आहे. मुंबई महापालिकेने याला मंजुरी दिली असून, आता हा प्रस्ताव एमएमआरसीएलकडे पाठवण्यात आला आहे. ज्या मोठ्या सोसायट्यांना मेट्रोची जोडणी हवी आहे, त्यांना एमएमआरसीएलला याचा खर्च द्यावा लागणार आहे. अनेक मोठ्या विकासकांनीही यासाठी तयारी दर्शवली आहे.

वरिष्ठ अधिकाऱ्यांनी दिलेल्या माहितीनुसार, हा प्रस्ताव आता एमएमआरसीएलकडे (MMRCL) पाठवण्यात आला आहे. मेट्रो-3 (Metro-3) लाईनशी जोडणी हवी असलेल्या मोठ्या निवासी संकुलांना या भुयारी मार्गासाठी एमएमआरसीएलला पैसे द्यावे लागतील. या योजनेत अनेक मोठ्या बिल्डर्सनीही रस दाखवला आहे आणि ते खर्च करण्यास तयार आहेत. यामुळे रहिवाशांना मेट्रो स्टेशनपर्यंत पोहोचणे सोपे होणार आहे.