चंद्रमणी जामगडे हे साधे, प्रामाणिक आणि मेहनती कर्मचारी म्हणून ओळखले जात. २१ ऑक्टोबर रोजी त्यांना घरीच अचानक भोवळ आली. कुटुंबीयांनी तात्काळ त्यांना नागपूरमधील न्यू इरा हॉस्पिटलमध्ये दाखल केले. डॉक्टरांच्या टीमने सर्वतोपरी प्रयत्न करूनही त्यांच्या मेंदूमध्ये तीव्र रक्तस्राव झाल्याचे निदान झाले आणि अखेर त्यांना मेंदू मृत घोषित करण्यात आले. त्या क्षणी संपूर्ण कुटुंबावर दु:खाचा डोंगर कोसळला होता. दिवाळीच्या सणाच्या काहीच दिवस आधी प्रिय व्यक्तीला गमावण्याचे दुःख कोणत्याही कुटुंबासाठी असह्य असते. मात्र या शोकातही चंद्रमणींचे मुलं वीरू आणि पंकज यांनी धैर्य दाखवत एक हृदयस्पर्शी निर्णय घेतला.
विदर्भाला दिवाळी भेट; मुख्यमंत्र्यांकडून महत्त्वाकांक्षी प्रकल्पांची घोषणा, कोट्यवधींचा खर्च करणार
चंद्रमणी जामगडे यांचा मेंदूमृत झाल्यानंतर डॉ. अरिनी चौधरी यांनी जामगडे कुटुंबीयांशी संवाद साधला आणि अवयवदानाविषयी माहिती दिली. समुपदेशनानंतर जामगडे कुटुंबाने हृदय, दोन मूत्रपिंडे आणि डोळे दान करण्यास संमती दर्शवली. चंद्रमणींचे हे अवयव चार रुग्णांना नवे आयुष्य देऊन गेले. दिवाळीच्या या पवित्र पर्वावर एका कुटुंबाने आपले दुःख बाजूला ठेवून दुसऱ्यांच्या जीवनात प्रकाश पेरला, हाच या सणाचा खरा अर्थ आहे.
Nagpur Crime : उधारीचे पैसे देण्यास उशीर, पंपावर पेट्रोल भरण्यास गेला असता युवकावर हल्ला; जखमी तरुणाचा उपचारादरम्यान करुण अंत

महानगर पालिकेतील सहकाऱ्यांनी आणि परिसरातील नागरिकांनी जामगडे कुटुंबाच्या या निर्णयाचे कौतुक केले. “ते आयुष्यभर शहर स्वच्छ ठेवण्यासाठी झटले, आणि मृत्यूनंतरही आपल्या कृतीने त्यांनी माणुसकी स्वच्छ आणि उजळ ठेवली,” अशी भावना अनेकांनी व्यक्त केली. चंद्रमणी जामगडे यांच्या या मानवतावादी कार्यामुळे दिवाळीचा प्रकाश अधिक उजळ झाला आहे. कारण त्यांनी दाखवून दिले की अवयवदान हेच खरे जीवनदान, आणि हेच मानवतेचे सर्वात मोठे दीपदान आहे.