मंगळवारी (21 ऑक्टोबर) मुंबई, ठाणे, कल्याण, डोंबिवली, नवी मुंबई, अंबरनाथ-बदलापूर, वसई-विरार भागात हवामान उष्ण राहिले. दुपार नंतर ढग दिसू लागले आणि त्यानंतर मुंबई-महामुंबई भागात हलक्या वाऱ्यांसह पाऊस पडला. संध्याकाळी अचानक पडलेला पाऊस लक्ष्मी पूजनासाठी खरेदीला घराबाहेर आलेल्या लोकांसाठी अडथळा निर्माण करणारा ठरला. व्यापाऱ्यांनाही या अवकाळी पावसामुळे मोठा फटका बसला. आज संध्याकाळपासूनही पुणे आणि कोल्हापूर जिल्ह्यांमध्ये पावसाने हजेरी लावली आहे.

मुंबई-पुणे एक्सप्रेसवेवर प्रवास होणार जलद! 10 पदरी सुपर हायवेचा प्रस्ताव मंजूर; जाणून घ्या कधी होणार काम पूर्ण

पुढील तीन दिवस मुंबई-ठाण्यात पावसाची शक्यता

हवामान विभागाने अंदाज व्यक्त केला आहे की मुंबई आणि ठाणे जिल्ह्यात गुरुवारपासून शनिवारपर्यंत तीन दिवस हलक्या ते मध्यम सरींचा पाऊस पडण्याची शक्यता आहे. या काळात अधूनमधून वीजांसह हलका पाऊस पडू शकतो. त्यामुळे मुंबई आणि ठाण्यासाठी तीन दिवसांचा यलो अलर्ट जारी करण्यात आला आहे.

रत्नागिरी आणि सिंधुदुर्गमध्येही अलर्ट

दक्षिण कोकणातील रत्नागिरी जिल्ह्यात शनिवारपर्यंत आणि सिंधुदुर्ग जिल्ह्यात शुक्रवारीपर्यंत यलो अलर्ट जाहीर केला गेला आहे. काल दुपारनंतर रत्नागिरी शहर आणि आजूबाजूच्या भागांमध्ये काही ठिकाणी पुन्हा पाऊस सुरु झाला. वीज आणि वादळी वाऱ्यासह आलेल्या पावसामुळे नागरिकांना त्रास झाला. संध्याकाळी या पावसामुळे अनेक ठिकाणी वीज पुरवठा बंद झाला असल्यामुळे अनेक व्यापाऱ्यांना अंधारातच लक्ष्मीपूजा करावी लागली.

पुण्यातही पावसाची दमदार हजेरी नोंदवली गेली असून, राज्यातील विविध भागांत हवामानात ढगाळ वातावरण कायम आहे. हवामान विभागाने नागरिकांना सतर्क राहण्याचे आवाहन केले असून, आठवड्याच्या अखेरीस मुंबईसह कोकण किनारपट्टीवर पावसाची पुनरागमन शक्यता कायम आहे.