मिळालेल्या माहितीनुसार, पार्थची बहीण गार्गी सेंट जोसेफ स्कूल, फेटरी येथे तिसऱ्या वर्गात शिकते. शुक्रवारी नेहमीप्रमाणे सकाळी पार्थची आई पार्थची बहीण गार्गीला शाळेच्या बसपर्यंत सोडण्यासाठी गेली होती. ही स्कूलबस (एमएच ४० सीटी ४३९०) घराजवळच उभी होती. गार्गीला बसमध्ये चढवून आई मागे वळली तेव्हाच लहान पार्थ धावत मागून आला. आईला त्याची हालचाल लक्षात आली नाही, आणि त्याच क्षणी बस चालकाने बस सुरू केली.

बस सुरू होताच पार्थ बसच्या मागील चाकाजवळ गेला आणि मागील चाकाखाली आल्याने त्याच्या डोक्याला गंभीर दुखापत झाली. आसपासच्या लोकांनी तात्काळ मदतीसाठी धाव घेतली आणि पार्थला तातडीने नागपूरमधील कळमेश्वर येथील पोतदार मल्टीस्पेशालिटी रुग्णालयात दाखल करण्यात आले. मात्र, डॉक्टरांनी तपासून त्याला मृत घोषित केलं.

Sangli Crime : मित्रांसोबत बाहेर गेला, दारू पिण्यावरुन जोरदार राडा, चिडलेल्या मित्रांनी डोक्यात दगड टाकून मित्रालाच संपवलं; सांगली हादरलं

पार्थ हा कांडलकर दाम्पत्याचा एकुलता एक मुलगा होता. त्याचे वडील जिल्हा परिषद शाळेत शिक्षक आहेत. अचानक घडलेल्या या अपघातामुळे संपूर्ण परिवारावर शोककळा पसरली आहे. स्थानिक नागरिकांनीही या घटनेबद्दल तीव्र दुःख व्यक्त केले असून, परिसरात हळहळ व्यक्त केली जात आहे.

दरम्यान, या घटनेनंतर कळमेश्वर पोलिसांनी बस चालकाविरुद्ध निष्काळजीपणामुळे मृत्यू झाल्याचा गुन्हा दाखल केला आहे. पोलिसांकडून घटनेचा अधिक तपास सुरू आहे. शाळेच्या बसच्या सुरक्षिततेबाबत पालकांमध्ये आता तीव्र संताप निर्माण झाला आहे. अनेकांनी प्रशासनाला आणि शाळा व्यवस्थापनाला विनंती केली आहे की, अशा दुर्घटना टाळण्यासाठी चालक व सहाय्यक कर्मचाऱ्यांना योग्य प्रशिक्षण दिले जावं, तसेच बस सुरू करण्यापूर्वी सर्व बाजूंनी तपासणी करण्याचे कठोर नियम लागू करावेत. चार वर्षीय पार्थच्या मृत्यूने कळमेश्वर आणि नागपूर परिसरातील प्रत्येकाचे मन व्यथित केले आहे.