बार्शी शहर पोलिसांनी सीसीटीव्हीच्या आधारे अखेर त्याच्या मुसक्या आवळल्या आहेत. सीसीटीव्ही फुटेज आणि फिर्यादीच्या वर्णनावरून संशयिताला पकडण्यात यश आले असून, आरोपीने चौकशीत गुन्हा कबूल केला आहे. पोलिसांच्या कारवाईमुळे शहरातील व्यापाऱ्यांमध्ये सुरक्षिततेचा विश्वास वाढला आहे. कोर्टाच्या आदेशानुसार संशयीत चोरट्याचे नाव आणि ओळख सांगता येत नाही अशी माहिती दिली आहे.
हुबळी एक्सप्रेस दगडफेक प्रकरण: अल्पवयीन आरोपीस अटक, पोलिसांच्या चोख कामगिरीचं प्रवाशांकडून कौतुक

खरेदी करण्यासाठी जायचा आणि गल्ल्यावर डल्ला मारायचा

संशयीत चोरटा हा किराणा दुकानात खरेदीच्या बहाण्याने दुकानात येत होता आणि रेकी करून जात होता. अशीच एक घटना मे महिन्यात घडली होती. ७ मे २०२५ रोजी सकाळी १० वाजता बार्शीतील लक्ष्मीनगर येथील रहिवासी रमेश जवरीलाल बाफणा (वय ३०) यांच्या किराणा दुकानात एक अनोळखी व्यक्ती खरेदी करण्याच्या बहाण्याने आली. तेव्हा दुकानातील काउंटरजवळ ठेवलेली ९१ हजार रुपयांची रक्कम असलेली पैशांची बॅग चोरून नेली. याबाबत किराणा दुकानदार बाफणा यांनी दिलेल्या फिर्यादीवरून तात्काळ बार्शी शहर पोलिस ठाण्यात अनोळखी व्यक्तीविरुद्ध गुन्हा दाखल करण्यात आला होता.

सीसीटीव्हीच्या आधारे पोलिसांनी तपास सुरू केला

पोलिसांना तपासादरम्यान दुकानातील सीसीटीव्ही फुटेजमध्ये चोराच्या वर्णनाची माहिती मिळाली. या आधारे पथकाने संशयिताची शोध मोहीम सुरू केली. अखेर, दिनांक १५ ऑक्टोबर २०२५ रोजी गुन्हे प्रकटीकरण पथक प्रमुख उपनिरीक्षक उमाकांत कुंजीर यांच्या नेतृत्वाखालील पथकाने उपळाई रोड, बार्शी परिसरात पेट्रोलिंग करताना संशयिताला पकडले. संशयित सीबीझेड मोटरसायकलवर तोंड बांधून संशयास्पदरीत्या फिरत असल्याचे आढळले, जे फिर्यादीच्या वर्णनाशी आणि सीसीटीव्ही फुटेजशी जुळत होते. पोलीस पथकाने तात्काळ पाठलाग करून संशयिताला ताब्यात घेतले. चौकशीत त्याने नाव आणि पत्ता सांगण्यास नकार देत पळून जाण्याचा प्रयत्न केला, मात्र पोलिसांच्या सतर्कतेमुळे तो पकडला गेला. पोलीस ठाण्यात आणल्यानंतर पुढील तपासात त्याने चोरीचा गुन्हा कबूल केला. आरोपीचे नाव आणि पत्ता अद्याप जाहीर करण्यात आलेला नाही, परंतु तो स्थानिक गुंड असल्याची प्राथमिक माहिती समोर आली आहे.

ही यशस्वी कारवाई करण्यासाठी पीएसआय उमाकांत कुंजीर, हवालदार माने, हवालदार साठे, उपनिरीक्षक मुले, हवालदार मुठाळ , हवालदार उदार , हवालदार जाधव , हवालदार पवार , हवालदार देशमुख , कांस्टेबल शेख , कांस्टेबल उघडे, आणि हवालदार भांगे यांनी मोलाची भूमिका बजावली.