याबाबतची सविस्तर माहिती अशी की, जीवन (बदलले नाव) हा 16 वर्षीय मुलगा आपल्या आई-वडिलांसह व 12 वर्षीय लहान भावासोबत अकोला येथे वास्तव्यास आहे. वडील मजुरी करून कुटुंबाचा उदरनिर्वाह करत होते. परंतु काही महिन्यांपासून जीवन सतत आजारी पडू लागला. सुरुवातीला त्याच्यावर स्थानिक रुग्णालयात उपचार करूनही प्रकृतीत सुधारणा न झाल्याने त्याला पुढील तपासणीसाठी मोठ्या खासगी रुग्णालयात उपचारासाठी दाखल करण्यात आलं. यावेळी तिथे रक्त तपासणीतून जीवनला रक्ताचा कर्करोग असल्याचं निदान झालं.

कर्करोगाचे निदान झाल्यानंतर वैद्यकीय अधिकाऱ्यांनी उपचारासाठी बोन मॅरो प्रत्यारोपणाचा सल्ला दिला. तसंच सुमारे 25 ते 30 लाख रुपये खर्चाचा अंदाज सांगितला. या परिस्थितीत डॉक्टरांनी जीवनच्या कुटुंबाला ‘मुख्यमंत्री सहाय्यता निधी’च्या माध्यमातून आर्थिक मदत घेण्याचा सल्ला दिला होता. याकामे जीवनच्या पालकांनी तातडीने मुंबई गाठली. मुख्यमंत्री सहाय्यता निधी आणि धर्मादाय रुग्णालय मदत कक्षात धाव घेत त्यांनी कक्षप्रमुख रामेश्वर नाईक यांच्याशी संपर्क साधला. नाईक यांनी मुख्यमंत्री देवेंद्र फडणवीस यांच्या निर्देशानुसार तातडीने कार्यवाही केली आणि त्यातूनच मुंबई येथील जसलोक रुग्णालयात जीवनवर ताबडतोब उपचार सुरू करण्यात आले.

विविध स्रोतांतून मदतीचा हात
मुख्यमंत्री सहाय्यता निधी कक्षाने घेतलेल्या पुढाकारातून, टाटा ट्रस्टने मोठं योगदान दिलं, तसंच काही सामाजिक संस्थांच्या सहकार्याने एकूण 25 लाखांची मदत उभारण्यात आली. 4 सप्टेंबर 2025 रोजी जीवनच्या 12 वर्षीय लहान भावाने अस्थिमज्जा (स्टेम सेल्स) दान केले व त्यानंतर जसलोक रुग्णालयात जीवनवर यशस्वी बोन मॅरो प्रत्यारोपण करण्यात आलं.

दरम्यान, “जीवनप्रमाणेच अनेक गरीब व गरजू रुग्णांवर संवेदनशील मुख्यमंत्री देवेंद्र फडणवीस यांच्या निर्देशानुसार उपचार करण्यात येत असून दुर्धर आजार झाल्यास कोणीही निराश न होता मुख्यमंत्री सहाय्यता निधी कक्षाशी संपर्क साधावा आणि नागरिकांनी 1800 123 2211 या क्रमांकावर दूरध्वनी करावा,” असं आवाहन रामेश्वर नाईक यांनी केलं आहे.