आम्ही हे सर्व सांगण्यामागे देखील एक कारण आहे. बारामतीत एका तरुणाने सोशल मीडियावर दहशत निर्माण होईल असा व्हिडीओ सोशल मीडियावर शेअर केला होता. पोलिसांना याची मिळताच या तरुणाच्या विरोधात कठोर पावलं उचलली. या तरुणाला पोलिसांनी बेड्या ठोकल्या. सोशल मीडियावर तु्म्ही मनोरंजनात्मक किंवा माहिती देणारे व्हिडीओ शेअर करु शकतात. पण दहशत माजवणारे व्हिडीओ शेअर केले तर त्यांची खैर होणार नाही, असा मेसेजच सुपा पोलिसांनी आपल्या कारवाईतून दिली.

नेमकं काय घडलं?

सोशल मीडियावर लाईक्स आणि फॉलोअर्स मिळवण्यासाठी हातात शस्त्र घेऊन रील बनविणे एका तरुणाला चांगलेच महागात पडले आहे. इन्स्टाग्रामवर पिस्तूल सदृश्य वस्तू हातात घेऊन प्रक्षोभक आणि धमकीवजा मजकूर असलेली रील प्रसारित केल्याप्रकरणी सुपा पोलिसांनी तरुणावर शस्त्रास्त्र कायद्यासह विविध कलमांन्वये गुन्हा दाखल केला आहे. पोलिसांनी संबंधित तरुणाला अटक देखील केली आहे.

तरुणाच्या व्हिडीओत नेमकं काय होतं?

पोलिसांच्या सायबर मॉनिटरिंग पथकाच्या निदर्शनास 24 ऑगस्ट रोजी ‘prem_jagtap_0295’ या इन्स्टाग्राम अकाउंटवरील व्हिडिओ आला. बाबुर्डी (ता. बारामती) येथील प्रेम प्रताप जगताप याने पिस्तूल सदृश्य वस्तू हातात घेऊन हा व्हिडिओ पोस्ट केला होता. व्हिडिओमध्ये ‘आलीशान युवा प्रतिष्ठान’ असा मजकूर तसेच ‘जंगल अपना है, और कानून भी अपना है’ अशा धमकीवजा आशयाचा वापर करण्यात आला होता.

पोलिसांनी काय कारवाई केली?

या प्रकरणी सुपा पोलिसांनी स्वतःहून फिर्याद दाखल करून प्रेम जगताप याच्याविरुद्ध भारतीय न्याय संहिता कलम 251(2)(3), 223, भारतीय शस्त्र कायदा कलम 3(25) तसेच महाराष्ट्र पोलीस कायदा कलम 37(1)(3) आणि 135 अन्वये गुन्हा दाखल केला आहे. पुढील तपास पोलीस हवालदार रुपेश साळुंके करीत आहेत.

ही कारवाई पोलीस अधीक्षक संदीप सिंह गिल्ल, अप्पर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली सुपा पोलीस ठाण्याचे प्रभारी अधिकारी सहायक पोलीस निरीक्षक मनोजकुमार नवसरे यांच्या पथकाने केली.

पोलिसांचा असे व्हिडीओ बनवणाऱ्या तरुणांना इशारा

सोशल मीडियावर हत्यारांचे प्रदर्शन करून ‘आभासी भाईगिरी’ दाखविणाऱ्यांवर पोलिसांची करडी नजर आहे. ‘रीलसाठी रिअल लाईफ धोक्यात घालू नका’, असा इशारा सुपा पोलिसांनी दिला आहे.