Pune News : पुण्यातील कुख्यात गुंड निलेश घायवळ याच्यावरुन पुण्यातील राजकारण चांगलंच तापलं आहे. महायुतीमधीलच नेते युतीतील नेत्यांवर आरोप करत आहेत. यातच आता माजी आमदार रविंद्र धंगेकरांच्या मदतीला काँग्रेस धावून आली आहे.
अभिजीत दराडे, पुणे : गुंड निलेश घायवळ याचे राजकीय कनेक्शन समोर आल्यानंतर संपूर्ण राज्याचं राजकारण पेटलं आहे. यामध्ये प्रामुख्याने शिवसेनेचे पुणे महानगर प्रमुख रवींद्र धंगेकर यांनी केलेल्या आरोपांनंतर महायुतीमध्येच वाद सुरु झाले आहेत. रवींद्र धंगेकर यांनी गुंड निलेश घायवळ याच्याशी मंत्री चंद्रकांत पाटील यांच्या ऑफिसमधील व्यक्ती असलेले समीर पाटील यांचे संबंध आहेत, असे हे आरोप करून एकच खळबळ उडवून दिली होती. त्यानंतर रवींद्र धंगेकर यांनी पुण्यातील गुन्हेगारीवरून सातत्याने भारतीय जनता पक्षाला टार्गेट केलं. मात्र, धंगेकर यांच्या या पवित्र्यामुळे महायुतीत मिठाचा खडा पडतोय का? अशी शक्यता निर्माण होत असतानाच उपमुख्यमंत्री एकनाथ शिंदे यांनी रवींद्र धंगेकर यांना महायुतीत दंगा नको, असा इशारा वजा सूचना केली.
त्यानंतर रवींद्र धंगेकर हे महायुतीत एकाकी पडले आहेत का? असा प्रश्न निर्माण होऊ लागला. हा प्रश्न निर्माण होत असतानाच आता रवींद्र धंगेकर यांचे जुन्या पक्षातले सहकारी अर्थात काँग्रेसचे शहराध्यक्ष अरविंद शिंदे यांनी काँग्रेस रवींद्र धंगेकर यांच्या पाठीमागे ठामपणे उभा असल्याचं सांगितलं आहे. त्यामुळे आधी रोहित पवार आणि आता अरविंद शिंदे यांनी रवींद्र धंगेकर यांना पाठिंबा दिल्यामुळे महाविकास आघाडी धंगेकर यांच्यासोबत उभे असल्याचं स्पष्ट झालं आहे.
पुणे महापालिकेचा सर्वात मोठा निर्णय, भटक्या कुत्र्यांना ‘मायक्रोचिप’ बसवणार
‘गेल्या अनेक दिवसापासून माध्यमांमधून आम्ही पुण्यातील गुन्हेगारीचे अनेक प्रश्न बघत आहोत. त्यामध्ये धंगेकर जो प्रश्न उचलत आहेत तो पुणेकरांसाठी आहे. अनेकवेळा त्यांच्या तोंडामधून आम्ही, मी पुणेकर म्हणून विचारत आहे, असे शब्द ऐकले आहेत, आणि ते पुणेकर म्हणून विचारत असतील तर कोथरूडमध्ये मुरलीधर मोहोळ केंद्रीय राज्यमंत्री आहेत चंद्रकांत पाटील पुण्याचे पालकमंत्री राहिलेले आहेत. त्यांच्याच कोथरूडमधील गुन्हेगार हा आंतरराष्ट्रीय कायदे तोडून पसार झालेला आहे आणि तरीदेखील यांना उत्तर द्यायचे नाहीत. माजी आमदार म्हणून धंगेकर यांना उत्तर दिलेच पाहिजे पण सामान्य पुणेकरांनी सुद्धा जर हे प्रश्न विचारले तरी देखील तुम्हाला उत्तर द्यावे लागतील. मात्र, पत्रकारांनी प्रश्न विचारले तरी तुम्ही पत्रकार परिषद सोडून पळून जात आहात’, असं अरविंद शिंदे यांनी ‘महाराष्ट्र टाइम्स ऑनलाईन’शी बोलताना म्हटलं आहे.
‘धंगेकर जे प्रश्न विचारत आहेत त्यामध्ये आम्हाला तथ्य वाटत आहे. त्यामुळे मी वैयक्तिक असेल किंवा काँग्रेस पक्ष असेल आम्ही याकडे लक्ष देणार आहोत. धंगेकर जे प्रश्न विचारत आहेत ते पुणेकरांच्या सुरक्षेसाठी आहेत आणि त्यासाठी आम्ही धंगेकर यांच्या पाठीमागे ठामपणे उभे आहोत. धंगेकरांना मोक्का लावण्याची भीती दाखवली जात आहे, नोटीस पाठवल्या जात आहेत, त्यांच्याच पक्षाकडून त्यांना कॉर्नर केलं जात आहे, हे सगळं घडत असताना एक पुणेकर म्हणून धंगेकर यांच्या पाठीमागे उभे राहणे हे आमचं कर्तव्य’, असल्याचं अरविंद शिंदे यांनी म्हटलंय.
Nagpur Crime : स्थानिकांशी पैशांवरुन वाद, अल्पवयीन दोघांच्या डोक्याचा पारा चढला, कुख्यात गुंडाला मध्यरात्री संपवला
दरम्यान, आता काँग्रेसचे माजी नेते असणारे रवींद्र धंगेकर यांनी काँग्रेस सोडली तरी काँग्रेस पक्ष हा धंगेकर यांच्या मागे उभा असल्याचं चित्र पुण्यात पाहायला मिळत आहे. त्यामुळे पुण्याच्या राजकारणात येत्या काही दिवसात नवीन ट्विस्ट येणार का? हे पाहणं महत्त्वाचं आहे.
लेखकाबद्दलप्रशांत पाटीलप्रशांत पाटील यांना डिजिटल पत्रकारिता क्षेत्रात ३ वर्षांचा अनुभव आहे. ते ‘महाराष्ट्र टाइम्स ऑनलाइन’मध्ये कंटेंट प्रोड्यूसर म्हणून कार्यरत आहेत. याआधी थोडक्यात, आधान न्यूज वेबपोर्टलमध्ये डेस्कवर काम केलंय. महाराष्ट्रातील घडामोडी बघतात.… आणखी वाचा