नोंदवलेल्या तक्रारीनुसार, निलेश घायवळने एका व्यक्तीवर जबरदस्ती करून त्याच्या नावावर जीओचे सिमकार्ड बनवले आणि त्या सिम कार्डच्या क्रमांकावर वेगवेगळ्या बँकेत खाते उघडून त्यावरून मोठ्या प्रमाणावर आर्थिक व्यवहार करण्यात आले आहेत. त्या व्यक्तीने कोथरूड पोलीस ठाण्यात तक्रार नोंदवली आहे.

Pune Crime: फरार निलेश घायवळ प्रकरणात मोठा ट्विस्ट; पुणे पोलिसांकडून परदेशातून परत आणण्याची प्रक्रिया, पण वकिलाचा वेगळाच दावा

जीवेमारण्याची धमकी देत केली जबरदस्ती

फिर्यादी यांनी दिलेल्या तक्रारीनुसार, दि. 13 जानेवारी 2020 रोजी रात्री सुमारास 8 वाजता, आरोपी निलेश बन्सीलाल घायवळ (रा. संत ज्ञानेश्वर कॉलनी, शास्त्रीनगर, कोथरूड) यांनी फिर्यादी यांना जबरदस्तीने एका ठिकाणी नेले. त्यावेळी त्यांना जिवे मारण्याची धमकी देत, त्यांच्या ऑनलाईन आधारकार्डचा वापर करून जिओ कंपनीचे सिमकार्ड घेतले.

हे सिमकार्ड फिर्यादीच्या नावावर नोंदवून आरोपीने ते स्वतःचे असल्याचे भासवत वेगवेगळ्या बँकांमध्ये खाते उघडण्यासाठी वापरले. त्याद्वारे त्याने आर्थिक व्यवहार केले आणि फिर्यादी तसेच संबंधित बँकांची फसवणूक केली असल्याचे फिर्यादीच्या तक्रारीत नमूद आहे.सदर सिमकार्ड आरोपीकडे 2020 पासून आजपर्यंत असल्याचे आणि त्याचा वापर बेकायदेशीररीत्या चालू ठेवण्यात आला असल्याचेही पोलिस तपासात समोर आले आहे.

या प्रकरणात भा.दं.वि. कलम 420 (फसवणूक), 506 (धमकी), 504 (शाब्दिक दुखापत) तसेच माहिती तंत्रज्ञान कायदा कलम 66(C) आणि भारतीय दूरसंचार कायदा 2023 चे कलम 42 अंतर्गत गुन्हा नोंदवण्यात आला आहे. हा गुन्हा कोथरूड पोलीस ठाण्यात नोंदवला गेला असून पुढील तपास सुरू आहे.

या पूर्वी घायवळ टोळीतील गुंडांनी पुण्यात एका व्यक्तीला शस्त्राने मारहाण केल्याची आणि दुसऱ्यावर गोळीबार केल्याबद्दल पुणे पोलिसांना संपूर्ण टोळी विरोधात गुन्हा दाखल केला आहे. घायवळ सध्या लंडन मध्ये पसार झाला असून त्याला परत आणण्यासाठी पुणे पोलिसांचे प्रयत्न सुरू आहेत.