यातच आता शहरातील सर्वाधिक वर्दळीच्या परिसरांपैकी एक असलेल्या आरटीओ चौक आणि मंगळवार पेठेतील शाहीर अमर शेख चौकादरम्यानचा अरुंद रेल्वे भुयारी मार्ग अखेर विस्तारण्याच्या दिशेने पावले उचलली गेली आहेत. पुणे महापालिकेने या मार्गाच्या रुंदीकरणासाठी सल्लागार नियुक्त करण्याची प्रक्रिया सुरू केली असून लवकरच सविस्तर आराखडा तयार होणार आहे.

Pune Crime : ताई दुधाची पिशवी द्या; पुण्यात झकपक चोर दुकानात शिरला, मिनिटात मंगळसूत्र खेचलं, हादरवणारं CCTV फूटेज समोर

पुणे रेल्वे स्थानक, मालधक्का, ससून रुग्णालय, जिल्हाधिकारी कार्यालय आणि आरटीओ कार्यालय या महत्त्वाच्या ठिकाणांना जोडणारा हा मार्ग कायम वाहतूक कोंडीसाठी ओळखला जातो. शंभर वर्षांपूर्वी बांधण्यात आलेल्या या भुयारी मार्गाची सध्याची रुंदी फक्त पाच मीटर आहे. या अरुंद मार्गामुळे वाहनांच्या लांबच लांब रांगा लागतात, तर रेल्वे स्थानक गाठणाऱ्या प्रवाशांना वेळेत पोहोचणे अवघड होऊन जाते. भुयारी मार्गाची उंची कमी असल्याने मोठ्या वाहनांना विशेषतः मालधक्क्याकडे जाणाऱ्या ट्रकांना पर्यायी मार्गांचा वापर करावा लागतो. या सर्व समस्यांवर तोडगा काढण्यासाठी महापालिकेने रुंदीकरणाचा प्रस्ताव पुढे ठेवला असून रेल्वे प्रशासनालाही याबाबत पत्र पाठवण्यात आलं आहे.

रेल्वेकडून जागा मिळाल्यास, सध्याच्या भुयारी मार्गाशेजारी नऊ ते दहा मीटर रुंदीचा नवीन बोगदा बांधण्याचा आणि जुन्या मार्गाचेही रुंदीकरण करण्याचा महापालिकेचा मानस आहे. त्यामुळे एकत्रितपणे सुमारे वीस मीटर रुंदीचा दुहेरी मार्ग उपलब्ध होणार असून, वाहतूक कोंडीचा प्रश्न मोठ्या प्रमाणात सुटण्याची शक्यता व्यक्त केली जात आहे.

दरम्यान, या प्रकल्पासाठी सल्लागार नियुक्त करण्याची निविदा प्रक्रिया सुरू झाली आहे. निवड झाल्यानंतर सहा महिन्यांत सविस्तर प्रकल्प आराखडा तयार केला जाईल. त्यामध्ये भुयारी मार्गाची रचना, अंदाजित खर्च, आवश्यक जागा आणि तांत्रिक बाबींचा समावेश असेल. महापालिकेच्या मते, हा प्रकल्प पूर्ण झाल्यानंतर आरटीओ परिसरातील वाहतूक सुरळीत होऊन नागरिकांना मोठा दिलासा मिळेल.