धर्मांतर करण्यासाठी बीड जिल्हा कारागृहाचे अधीक्षक पेट्रस गायकवाड यांनी आम्हाला जेवण दिले नाही आणि मारहाण केली. तसेच काही कैद्यांची दाढी कापली, प्रार्थनाही बंद केली. याचबरोबर किर्तन, आरतीही बंद केल्याचा गंभीर आरोप खुनाच्या गुन्ह्यातून जामिनावर बाहेर आलेल्या एका कैद्याने केला आहे. यामुळे पुन्हा एकदा धर्मांतराचा प्रश्न गंभीर बनला आहे.
Gopichand Padalkar: ‘हिंदूंकडून खरेदी’ वक्तव्यानंतर संग्राम जगतापांची राष्ट्रवादीत अडचण; पण पडळकर मदतीला धावले, म्हणाले…

बीड जिल्हा कारागृहात असलेल्या बंडू जाधव या आरोपीस काही दिवसापूर्वी बेदम मारहाण झाल्याचे सांगण्यात येत आहे. बंडू जाधव हा माजलगाव तालुक्यातील मोगरा येथील रहिवाशी असून तो एका गुन्ह्यामध्ये जेलमध्ये आहे. त्याला जेलचे कर्मचारी आणि अधिकारी यांनी विनाकारण मारहाण केल्याचा खळबळजनक खुलासा समोर आला आहे. हा सर्व प्रकार तुरुंगातील सहा नंबरच्या बॅरेटमध्ये सीसीटीव्ही कॅमेरामध्ये कैद झाला आहे. सात नंबर बरेटसमोरील सर्कल कॅमेऱ्यात ही मारहाणीची घटना कैद झाल्याचे सांगण्यात आले आहे. याच पाठोपाठ आता
कारागृहातील भजन, आरती आणि प्रार्थनाही बंद केली गेली आहे. तसेच महापुरुष, संतांचे फोटोही काढून टाकण्यात आले आहेत, अशी माहिती मिळते आहे.

मीनाबाई जगताप यांनी काय सांगितलं?

‘माझा आंतरजातीय विवाह आहे. माझ्या पतीवर धर्मांतर करण्यासाठी दबाव आणला. त्यांना बेदम मारहाण केली. शरीरावर २२ ठिकाणी गंभीर जखमा होत्या. धर्मातर न केल्याने माझे पती चिन्या जगताप यांचा खून केल्याचा आरोप मीनाबाई जगताप यांनी पेट्रस गायकवाड यांच्यावर केला आहे.आता प्रकरण मिटवून घेण्यासाठी पोलिस आणि इतर लोकांमार्फत दबाव आणला जातो. जिवे मारण्याच्या धमक्या दिल्या जातात. न्यायालयात तारखेला आल्यावर गुंड घेऊन येतात. तसेच मला ४० लाख रुपये देण्याचे आमिष दाखवल्याचेही मीनाबाई यांनी सांगितले आहे.

चौकशी दरम्यान शाब्दिक खडाजंगी

या आरोपांच्या पार्श्वभूमीवर कारागृह उपमहानिरीक्षकांच्या विशेष पथकाने बीडमध्ये पाच तास कसून चौकशी केली. यावेळी चौकशीवरून दोन अधिकाऱ्यांमध्ये शाब्दिक खडाजंगी झाल्याचेही सूत्रांनी सांगितले आहे.

पथकाकडून आरोपांची सत्यता पडताळणी

जेलर गायकवाड यांनी तीन कैद्यांना विशिष्ट धार्मिक ग्रंथांचे वाचन करण्यास सांगणे, तसेच काही कैद्यांना प्रार्थना करण्यास भाग पाडणे, असे प्रकार केले असल्याचा त्यांच्यावर आरोप आहे. या प्रकाराची तक्रार वरिष्ठांपर्यंत पोहोचल्यानंतर हे तपास पथक बीडमध्ये पोहोचले आहे. पथकाने जेलर पेट्रस गायकवाड यांच्यासह तुरुंगातील तीन कैद्यांचे जबाब नोंदवले आहेत. सर्वात महत्त्वाचे म्हणजे, पथकाने कारागृहातील संबंधित कैद्यांशी थेट संवाद साधून त्यांच्याकडून या आरोपांची सत्यता पडताळली. चौकशीदरम्यान खडाजंगी झाल्याचीही माहिती आहे.

या गंभीर आरोपामुळे जेलर पेट्रस गायकवाड यांच्यावर कारवाईची टांगती तलवार आहे. चौकशी पथक आता या अहवालाच्या आधारे पुढील कार्यवाही करणार असून, या प्रकरणाचे गांभीर्य लक्षात घेता, प्रशासकीय स्तरावर मोठे बदल होण्याची शक्यता वर्तवली जात आहे. जिल्हा कारागृहातील या घटनेमुळे बीडच्या प्रशासकीय वर्तुळात तणावाचे वातावरण निर्माण झाले आहे.