निवडणूक आयोगाने प्रभाग रचनेस दिलेल्या मंजुरीनंतर मुंबईतील २२७ प्रभागांपैकी सहा प्रभागांच्या रचनेत काहीसे बदल झाले आहेत. यामध्ये पूर्व उपनगरांतील दोन आणि पश्चिम उपनगरांतील चार प्रभागांचा समावेश आहे.

मुंबई महापालिकेचा कार्यकाळ ७ मार्च, २०२२ रोजी संपुष्टात आला. तेव्हापासून मुंबई महापालिकेवर प्रशासक आहे. त्यामुळे मुंबई महापालिका निवडणुका होणार कधी, असा प्रश्न सर्वांनाच भेडसावत आहे. यासंदर्भात न्यायालयीन प्रक्रिया सुरू असतानाच राज्यातील स्थानिक स्वराज्य संस्थांच्या निवडणुका पुढील चार महिन्यांत घेण्याचे आदेश सर्वोच्च न्यायालयाने दिले. त्यापाठोपाठ राज्य सरकारने प्रभाग रचनेबाबत आदेश काढले. त्यानंतर मुंबईतील २२७ प्रभाग रचनेनुसारच निवडणुका होण्याचा कार्यक्रम सुरू झाला.

प्रभाग रचनेवर काम केल्यानंतर त्यावर महापालिकेने मुंबईकरांकडून हरकती व सूचना मागवल्या. त्यानंतर सुनावणीही घेण्यात आली. एकूण ४९४ हरकती व सूचना महापालिकेकडे प्राप्त झाल्या होत्या. सुनावणीनंतर हरकती व सूचनांवरील शिफारशी विचारात घेऊन प्राधिकृत अधिकाऱ्यांनी प्रभाग रचना अंतिम करून १५ सप्टेंबरपर्यंत नगरविकास विभागाला सादर केल्या. त्यानंतर नगरविकास विभागाने राज्य निवडणूक आयोगाला प्रभाग रचना अहवाल सादर केल्यानंतर त्यांना अंतिम मंजुरी देऊन ६ ऑक्टोबरला त्या प्रसिद्ध करण्यात आल्या.
Bapu Pathare : शरद पवारांच्या आमदाराचा लेक भाजपच्या वाटेवर, पक्षप्रवेश रोखण्यासाठी पुण्यात बडा नेता सरसावला, थेट मुंबईत फील्डिंग
महापालिकेकडे प्राप्त ४९४ हरकती व सूचनांपैकी ३०७ हरकती व सूचना ग्राह्य धरण्यात आल्याची माहिती महापालिकेतील सूत्रांनी दिली. उर्वरित विविध कारणांनी स्वीकारल्या नाहीत. मुंबईतील २२७ प्रभागांपैकी सहा प्रभागांत काही प्रमाणात बदल असून, त्यासंदर्भातीलच ३०७ हरकती व सूचना असल्याची माहिती देण्यात आली.

सहा प्रभागांपैकी चार प्रभाग हे पश्चिम उपनगरांतील, तर दोन पूर्व उपनगरांतील प्रभाग आहेत. पूर्व उपनगरांतील प्रभाग क्रमांक १३० आणि प्रभाग क्रमांक १६९ मध्ये काहीसे बदल केले आहेत. तर, पश्चिम उपनगरांतील प्रभाग क्रमांक ९५ आणि ९६ मध्ये सुधारणा करून काही परिसर प्रभाग क्रमांक ९६ मध्ये, प्रभाग क्रमांक १३ आणि १४ मध्ये सुधारणा करून काही परिसर प्रभाग क्रमांक १४ मध्ये, प्रभाग क्रमांक ३४ आणि ३२ मध्ये सुधारणा करून काही परिसर प्रभाग क्रमांक ३२ मध्ये आणि प्रभाग क्रमांक ४२ आणि ४३ मध्ये सुधारणा करून काही परिसर प्रभाग क्रमांक ४३ मध्ये समाविष्ट करण्यात आल्याची माहिती सूत्रांनी दिली. एका प्रभागातील काही परिसर, इमारती दुसऱ्या प्रभागात समाविष्ट केल्या आहेत. त्यामुळे काही प्रमाणात मतदार संख्येतही बदल झाले आहेत.
Pune News : पुणे महापालिका निवडणुकीत अजितदादा स्वबळावर? शिवसेना-भाजप युतीचे संकेत, इच्छुक म्हणतात…

प्रभाग आरक्षण सोडत

राज्य निवडणूक आयोगाने प्रभाग रचनेस मंजुरी दिल्यानंतर मतदारयाद्या अंतिम होतील. सध्या विधानसभानुसार असलेल्या मतदारयाद्या निवडणूक आयोगाकडून महापालिकेला दिल्या जातील. त्याचे प्रभाग रचनेनुसार विभाजन केले जाईल. त्यानंतर या याद्या नगरविकास विभाग आणि नंतर राज्य निवडणूक आयोगाकडे मंजुरीसाठी जातील. त्याला मंजुरी मिळाल्यानंतर प्रभाग आरक्षण सोडत जाहीर होईल. ऑक्टोबर अखेरीस ही सोडत जाहीर होण्याची शक्यता असल्याचे सूत्रांनी सांगितले.