मुंबईत सध्या मेट्रो १, गुंदवली ते दहिसर मेट्रो ७, दहिसर ते अंधेरी पश्चिम मेट्रो २ अ आणि आरे जेव्हीएलआर-बीकेसी-आचार्य अत्रे चौक ही भूमिगत मेट्रो ३, अशा चार मेट्रो सेवा सुरू आहेत. त्यांची एकूण लांबी ७० किमी आहे. या चारही मेट्रो एकमेकांशी संलग्न आहेत. सध्या प्रवासी एका मेट्रोतून उतरून संलग्न दुसऱ्या मेट्रोने इच्छितस्थळी जाऊ शकतात. मात्र, आत्तापर्यंत त्यासाठीचे तिकीट वेगवेगळे होते. या चार मेट्रोंचे संचालन करणाऱ्या कंपन्या तीन वेगवेगळ्या आहेत. त्यामुळेच एका मेट्रोतून दुसऱ्या मेट्रोने प्रवास करताना प्रवाशांना स्वतंत्र तिकीट काढावे लागत होते. आता मात्र त्यांना सामायिक तिकीट काढता येणार आहे.
Konkan Railway App : कोकण रेल्वेचं नवं ॲप, कोकणात प्रवास करणाऱ्या प्रवाशांना एका क्लिकवर मिळणार गाड्यांची सद्यस्थिती

भारतीय कंपनीने विकसित केले ॲप

हा मुंबईच्या मेट्रोला आकार देणाऱ्या महत्त्वाच्या प्रकल्पांपैकी एक असेल. यासाठी ‘वन तिकीट’ हे ॲप ‘सिक्वेल स्ट्रींग’ या भारतीय कंपनीने विकसित केले आहे. सुरुवातीला या ॲपचा उपयोग मेट्रो ३च्या ऑनलाइन तिकीटांसाठी होत होता. मात्र, सर्व मेट्रोंसाठी एकच सामायिक तिकीट काढता येण्यासाठी मेट्रो १ चालवणाऱ्या मुंबई मेट्रो वन प्रायव्हेट लिमिटेडने (रिलायन्स इन्फ्रास्ट्रक्चरच्या मक्तेदारीतील कंपनी) सिक्वेल स्ट्रींग व ऑनलाइन नेटवर्क डिजिटल कॉमर्स (ओएनडीसी) यांच्या सहकार्याने ‘वन तिकीट’ ॲपला गुगल मॅपशी जोडत त्याचा विस्तार केला आहे. यामुळे आता सध्या कार्यान्वित असलेल्या चारही मेट्रोवर प्रवासी एकदाच तिकीट काढून प्रवास करू शकणार आहेत.
‘भुयारी मेट्रो ३’ चे बांधकाम पूर्ण; सीएसएमटी, चर्चगेट, मंत्रालयही जोडलं जाणार, कुठून-कसा असेल मार्ग?
‘मेट्रोचे सामायिक तिकीट हे तंत्रज्ञानच नाही तर नागरिकांच्या दृष्टीनेही मैलाचा दगड ठरणार आहे. ओएनडीसीच्या माध्यमातून व एआयद्वारे सक्षम प्रवासाची सोय झाली आहे’, असे सीईओ, सिक्वेल स्ट्रींग कंपनी, रवीश सहाय यांनी सांगितले.

असे काढा तिकीट

‘वन तिकीट’ ॲप डाऊनलोड करा. त्यानंतर मोबाइल क्रमांकाने ‘साइन अप’ करून ओटीपी टाका. त्यानंतर स्थानकाची निवड करून अधिकाधिक चार तिकिटे काढता येतील. तिकिटाचे भाडे ऑनलाइन भरणा करायचे आहे. त्यानंतर क्यूआर कोड तयार झाल्यानंतर तो मेट्रो स्थानकांच्या प्रवेशद्वारावर स्कॅन करून प्रवास करता येईल.
Thane Metro : ठाणे मेट्रो ५८ किमी लांबीची देशातील सर्वात मोठी मार्गिका, थेट मुंबईला जोडणार; पुढील वर्षाअखेरीस सेवेत

तिकीट खिडकीवर हे तिकीट मिळणार नाही

‘वन तिकीट’ ॲपची चाचणी मागील चार महिन्यांपासून सुरू होती. आता हे ॲप पूर्णपणे तयार झाले आहे, असे एमएमओपीएलने ‘ महाराष्ट्र टाइम्स ‘ला सांगितले. या ॲपमुळे प्रवाशांना ५७ स्थानकांचे तिकीट एकाच वेळी काढता येणार आहे. विशेष म्हणजे, ही सुविधा फक्त ‘वन तिकीट’ ॲपवरच उपलब्ध आहे. तिकीट खिडकीवर हे तिकीट मिळणार नाही. आता प्रश्न आहे की, या सगळ्या मेट्रो कंपन्यांमध्ये पैशांचे वाटप कसे होणार? तर, ॲप बनवणाऱ्या कंपनीनेच हे काम स्वीकारले आहे. तिकीट विक्रीतून मिळणारे पैसे कंपनीच सगळ्या मेट्रो कंपन्यांना देणार आहे.

महसूल वितरण कंपनीच करणार

मुंबईत सध्या कार्यरत चार मेट्रॉमध्ये मेट्रो १ ही मुंबई मेट्रो वन लिमिटेड प्रायव्हेट (एमएमओपीएल), मेट्रो ३ ही मुंबई मेट्रो रेल कॉर्पोरेशन लिमिटेडकडून (एमएमआरसीएल) व मेट्रो २ अव मेट्रो ७ ही मुंबई महानगर प्रदेश विकास प्राधिकरणाच्या (एमएमआरडीए) उपकंपनीकडून चालवली जाते. यामध्ये महसूल भागीदारीचा प्रश्न होता. त्यामुळेच आत्तापर्यंत सामायिक तिकीट निघू शकत नव्हते. हा प्रश्न ॲप विकसित केलेल्या कंपनीनेच आता मार्गी लावला असून तिकीटाद्वारे मिळणारा महसूल ती कंपनीच संबंधित मेट्रो संचालन करणाऱ्या कंपन्यांमध्ये वितरित करणार आहे. या सामायिक तिकीटाची चाचणी चार महिन्यांपासून सुरू होती व आता त्यास मूर्त रूप आल्याचे एमएमओपीएलने ‘महाराष्ट्र टाइम्स’ला सांगितले.

५७ स्थानकांचे सामायिक तिकीट

या ॲपमुळे आता प्रवाशांना संबंधित चार मेट्रोवरील ५७ स्थानकांचे तिकीट एकदाच पैसे भरून ऑनलाइन पद्धतीने मिळणार आहे. सामायिक तिकीटाची ही सुविधा केवळ ‘वन तिकीट’ ॲपवरच आहे, तिकीट खिडकीवर नसेल. यामुळे घाटकोपर, वर्सोवा, अंधेरी, दहिसर, आरे, आचार्य अत्रे चौक, सिद्धिविनायक, मालाड, दिंडोशी, बीकेसी, विमानतळ, कांदिवली, सीप्झ, सांताक्रुझ, दादर, वरळी, ओशिवरा, पोईसर अशी मेट्रोची विविध स्थानके एकमेकांशी प्रत्यक्षपणे जोडली गेली आहेत.