अपंगत्वावर मात करत या महिलेने धैर्य दाखविले. यात तिला स्वतःचे प्राण गमवावे लागले. या घटनेने तिची पोटची दोन मुले मात्र मातृत्वाला पारखी झाली. बागलाण तालुक्यातील ठेंगोडा येथे घडलेली ही हृदयस्पर्शी घटना संपूर्ण परिसराला अश्रूमध्ये भिजवून गेली. सविता केदा पवार उर्फ सोनाली (रा. नवेगाव, ता. बागलाण) असे मृत्युमुखी पडलेल्या मूकबधिर महिलेचे नाव आहे. सविता काही दिवसांपूर्वी माहेरी ठेंगोडा येथे आई-वडिलांना भेटण्यासाठी आली होती.
सिंहस्थासाठी आता कर्ज काढण्याचा मार्ग मोकळा; नाशिक महापालिकेला ऐतिहासिक ‘अअ+’ रेटिंग
शनिवारी सकाळी घराशेजारील एका बालिकेला अचानक शेजारील तारेचा स्पर्श होऊन विजेचा जोरदार धक्का बसला. मदतीसाठी आक्रोश करणारे आवाज तिला ऐकू येत नसतानाही, नजरेसमोर उभ्या राहिलेल्या दृश्याने सविता त्या बालिकेच्या मदतीसाठी धावली. क्षणाचाही विलंब न करता तिने विद्युत तारेच्या विळख्यात सापडलेल्या बालिकेला सोडवले. त्या चिमुकलीचे प्राण वाचले. मात्र विजेच्या प्रवाहामुळे सविता जागीच कोसळली. जन्मजात मूकबधिर असल्याने ती कुणालाही मदतीला बोलावू शकली नाही. तरीदेखील तिने निःस्वार्थ धैर्य दाखवत मानवतेचा धर्म निभावला.
नाशिक-पुणे सेमी हायस्पीड रेल्वेची चाके थांबलेलीच! महारेल अन् मध्य रेल्वे प्रकल्पाबाबत अनुत्सुक
या घटनेने ठेंगोडा व नवेगाव परिसरावर शोककळा पसरली आहे. सविताच्या मागे पती, दोन लहान मुले, सासू-सासरे असा परिवार आहे. सटाणा पोलिस ठाण्यात आकस्मिक मृत्यूची नोंद झाली आहे. सविता यांनी आयुष्याचा सर्वोच्च त्याग करून मानवतेचे उदाहरण घालून दिले आहे. तिच्या बलिदानाची आठवण समाजाला सदैव प्रेरणा देत राहील, अशी चर्चा परिसरात सुरू होती.