१३ लाखांपेक्षा अधिक प्रवासी प्रवास करू शकतील

या मार्गिकेच्या गायमुख जंक्शन-गायमुख गाव-घोडबंदर रोड-कासारवडवली-विजय गार्डन या टप्प्याची चाचणी करण्यात आली. ‘या मेट्रोच्या सर्व मार्गिका सुरू झाल्यावर यामध्ये १३ लाखांपेक्षा अधिक प्रवासी दैनंदिन प्रवास करू शकतील. त्यामुळे रस्त्यावरची वाहतूक मोठ्या प्रमाणात कमी होईल,’ असे फडणवीस यांनी यावेळी सांगितले. ‘फडणवीस यांच्या नेतृत्वात या मेट्रोच्या कामाला परवानगी मिळाली होती. त्यांच्याच काळात हा प्रकल्प पूर्णत्वास येत असल्याचा विशेष आनंद होत आहे. वाहतूककोंडीचा प्रश्न मार्गी लावण्यासाठी हा प्रकल्प महत्त्वाची भूमिका बजावेल,’ असे उपमुख्यमंत्री शिंदे यांनी नमूद केले.
Thane Metro : ठाण्यात आज मेट्रोची चाचणी, ठाण्यातून वडाळा-CSMT पर्यंत कसा असेल मार्ग?
हा टप्पा पूर्ण करण्याबाबत फडणवीस यांनी यावेळी शिंदे व परिवहनमंत्री प्रताप सरनाईक यांचे अभिनंदन केले. ‘मोघरपाडा येथे मेट्रो डेपोच्या जागेबाबत अडचणी होत्या. त्या दूर झाल्याने मेट्रोच्या कामाला वेग आला,’ असे त्यांनी स्पष्ट केले. याप्रसंगी परिवहनमंत्री प्रताप सरनाईक, खासदार नरेश म्हस्के, आमदार निरंजन डावखरे व शिवाजी पाटील, माजी आमदार रवींद्र फाटक, एमएमआरडीएचे महानगर आयुक्त डॉ. संजय मुखर्जी, उपमुख्यमंत्री कार्यालयाचे प्रधान सचिव नवीन सोना, कोकण विभागीय आयुक्त डॉ. विजय सूर्यवंशी, ठाण्याचे जिल्हाधिकारी श्रीकृष्ण पांचाळ उपस्थित होते.

दरम्यान, या कार्यक्रमाला उपमुख्यमंत्री अजित पवार गैरहजर राहिल्याने महायुतीतील घटकपक्ष असलेल्या राष्ट्रवादी काँग्रेसचे पदाधिकारी अनुपस्थित राहिले. तसेच शिवसेनेच्या तुलनेत भाजपचे माजी नगरसेवक व पदाधिकाऱ्यांनी कार्यक्रमस्थळी मोठी गर्दी केली होती. यावेळी फडणवीस यांचे आगमन होताच भाजप कार्यकर्त्यांनी त्यांचे जोरदार स्वागत केले.