पारंपरिक घटस्थापना विधी

अंबाबाई मंदिरात घटस्थापनेसाठी पहाटे मंदिर उघडल्यापासूनच श्रीपूजकांची विधीपूर्व तयारी सुरू होती. विधिवत पूजेनंतर देवीच्या गाभाऱ्यात घटस्थापना झाल्यानंतर देवीची आरती, अभिषेक आणि घंटानाद करण्यात आला. यंदा घटस्थापनेचा धार्मिक विधी शेखर मुनीश्वर आणि कुटुंबाच्या हस्ते पार पडला. तर अंबाबाई मंदिराचे व्यवस्थापक महादेव दिंडे यांच्या उपस्थितीत देवीच्या मूर्तीला अभिषेक विधी यांच्या हस्ते करण्यात आला. घटस्थापनेनंतर परंपरेप्रमाणे धनाजी जाधव यांच्या हस्ते तोफेची सलामी देण्यात आली. पूर्वीपासून या तोफेच्या सलामीनंतरच करवीरवासीय घरोघरी शारदीय नवरात्रोत्सवाला सुरुवात करतात.

भाविकांसाठी देवस्थान समितीकडून सुविधा

मंदिर परिसरात भाविकांची सोईसाठी अनेक सुविधा उभारण्यात आल्या आहेत. दर्शनासाठी पत्र्याचे शेड, ठिकठिकाणी पिण्याच्या पाण्याची सोय करण्यात आली आहे. तर मंदिरातील जुन्या काळातील चढ-उताराची रचना लक्षात घेता, गर्दीचे योग्य नियोजन करण्यासाठी मोठ्या आकाराच्या पायऱ्यांवर लाकडी रॅम्पही बसवण्यात आला आहे. या सुरक्षित आणि व्यवस्थित दर्शन रांगांमुळे आता अधिक वेगाने भाविकांना देवीचे दर्शन घेता येत आहे.

प्रथमच AI तंत्रज्ञानाचा वापर

यंदा 25 ते 30 लाख भाविक मंदिरात दर्शनासाठी येण्याचा अंदाज पश्चिम महाराष्ट्र देवस्थान समितीने वर्तवला आहे. त्यामुळेच यावेळी प्रथमच AI तंत्रज्ञानाचा वापर करून गर्दीवर नियंत्रण ठेवण्यात येत आहे. यासाठी स्वतंत्र नियंत्रण कक्षही उभारण्यात आला आहे. गर्दी नियंत्रणासह भाविकांच्या सुरक्षिततेसाठी गुन्हेगारांवर लक्ष ठेवण्यासाठी या आधुनिक तंत्रज्ञानाचा योग्य वापर करण्यात येत आहे. तर मंदिर परिसरावर 24 तास 120 सीसीटीव्ही कॅमेऱ्यांच्या माध्यमातून लक्ष ठेवले जात आहे. तसेच जिल्हा पोलीस दलाच्या नेतृत्वाखाली लाखो भाविकांसाठी मोठा पोलीस बंदोबस्तही तैनात केला आहे. पोलीस व सुरक्षा कर्मचारी भाविकांसाठी मदत आणि मार्गदर्शन करत आहेत.

यंदा दशमहाविद्या रूपांमध्ये देवीची सालंकृत पूजा

या नऊ दिवसांच्या उत्सवामध्ये यंदा दररोज देवीच्या दशमहाविद्या रूपांमध्ये सालंकृत पूजा व अभिषेक होणार आहेत. यामध्ये नवरात्रीच्या पहिल्या माळेला श्री कमलादेवी त्यानंतर श्री बगलामुखी, श्री तारा, श्री मातंगी, श्री भुवनेश्वरी, अंबारीतील पूजा, श्री षोडशी त्रिपुरसुंदरी, श्री महाकाली, श्री महिषासुरमर्दिनी, श्री भैरवी आणि दसऱ्याच्या दिवशी देवीची रथारुढ पूजा बांधली जाणार आहे. प्रत्येक दिवशी भव्य पालखी मिरवणूक व सांस्कृतिक कार्यक्रमही आयोजीत केले जाणार आहेत.

दरम्यान या वर्षी अंबाबाई मंदिरात नवरात्रोत्सवाचा पारंपरिक धार्मिक उत्सव आधुनिक सुविधांसह अत्यंत सुरक्षीत आणि भक्तपूर्ण वातावरणात पार पडत आहे. शारदीय नवरात्रीच्या निमित्ताने मंदिर परिसर दिपमालांनी आणि फुलांनी सजवण्यात आला असून, मंगल गीतांमुळे भक्तिभावात पार पडणारा हा उत्सव म्हणजे कोल्हापुरकरांसह देशभरातील भाविकांसाठी आत्मिक समाधानाची अनुभूती देणारा उत्सव ठरत आहे.