पाहणीदरम्यान माध्यमांशी संवाद साधताना अश्विनी वैष्णव म्हणाले, ‘मुंबईच्या उपनगरी रेल्वे मार्गावर दररोज लाखो प्रवासी प्रवास करतात. त्यांची सुरक्षा ही आमचे प्राधान्य आहे. त्यामुळे सध्या धावणाऱ्या जुन्या लोकल गाड्यांनाही ऑटोमॅटिक डोअर क्लोजिंग सिस्टीम बसवली जाणार आहे. तंत्रज्ञानाच्या जोडीने जुन्या गाड्यांचेही आधुनिकीकरण केले जाईल.’
Mumbai Local Mega Block: मुंबईकरांचा रविवारी खोळंबा! मध्य, हार्बर रेल्वेमार्गावर ब्लॉक, Timetable बघूनच घराबाहेर पडा

लोकल गाड्यांचे नूतनीकरण

रेल्वे मंत्र्यांनी असे नमूद केले की, नव्याने बनणाऱ्या सर्व नॉन-एसी लोकल गाड्यांमध्ये स्वयंचलित प्रणालीसाठी स्वतंत्र तरतूद केली आहे. पहिली अशा स्वरूपाची आधुनिक लोकल पुढील वर्षापासून प्रवाशांच्या सेवेत दाखल होणे अपेक्षित आहे. सध्या फक्त एसी लोकलमध्येच ही सुविधा उपलब्ध आहे.मुंबईकरांना सुरक्षित आणि आधुनिक प्रवासाची हमी देण्यासाठी मंत्रालयाने 238 नव्या एसी लोकल गाड्या खरेदी करण्याची प्रक्रिया देखील सुरू केली आहे. ‘लवकरच मुंबईच्या उपनगरी रेल्वेचे स्वरूप पूर्णपणे बदललेले दिसेल,’ असेही वैष्णव यांनी अधोरेखित केले.

दुर्घटनेनंतर वेगाने हालचाल

जून 2025 मध्ये मुंब्रा जवळ दोन लोकल गाड्यांमधून प्रवासी खाली पडून झालेल्या दुर्दैवी अपघातानंतर रेल्वे मंत्रालयाने तातडीने पावले उचलली आहेत. यानंतर इंटिग्रल कोच फॅक्टरी (ICF) ला सर्व नॉन-एसी गाड्या नव्याने डिझाईन करण्याचे काम देण्यात आले आहे. यात स्वयंचलित दरवाजांसोबतच योग्य व्हेंटिलेशनचीही सोय करण्यात आली आहे. या संपूर्ण प्रकल्पासाठी मुंबई रेल्वे विकास कॉर्पोरेशन (MRVC) ने सुमारे 21 हजार कोटी रुपये किमतीचे 2856 पूर्णपणे वातानुकूलित वंदे मेट्रो कोच खरेदी करण्यासाठी आधीच जागतिक निविदा काढण्यात आलेली आहे. स्वयंचलित दरवाजे सुविधेसह गादीयुक्त सीट, मोबाइल चार्जिंग पॉइंट्स, इन्फोटेनमेंट स्क्रीन आणि १३० किमी प्रतितास वेग गाठण्याची क्षमता या सुविधांचाही समावेश असणार आहे

प्रवाशांसाठी हवा खेळती करणारं तंत्रज्ञान

फक्त दरवाजेच नव्हे, तर प्रवाशांच्या सोयीसाठी नव्या लोकलमध्ये लुव्हर्ड पॅनेल्स आणि छतावर व्हेंटिलेशन युनिट्स बसवले जाणार आहेत. त्यामुळे गर्दीच्या वेळेसही हवा खेळती राहील आणि प्रवाशांना पुरेसा श्वास घेणे सुकर होईल.

पहिली लोकल नोव्हेंबरमध्ये

‘पहिली आधुनिक नॉन-एसी लोकल नोव्हेंबर 2025 पर्यंत तयार होईल. त्यानंतर सुरक्षा तपासण्या आणि प्रमाणन प्रक्रिया पूर्ण केल्यानंतर 2026 मध्ये ती सार्वजनिक सेवेत दाखल होणार आहे,’ असे रेल्वेमंत्र्यांनी सांगितले.

सुलभ प्रवासाची हमी

मुंबईकरांसाठी लोकल म्हणजे जीवनवाहिनी. गर्दी, अपघात आणि दरवाजांवरील धोकादायक प्रवास यामुळे प्रवाशांची चिंता कायम होती. मात्र आता स्वयंचलित दरवाजे आणि सुधारित सोयीमुळे मुंबईकरांचा प्रवास अधिक सुरक्षित, आधुनिक आणि सुलभ होणार आहे. रेल्वेचे हे पाऊल दैनंदिन जीवनात मोठा दिलासा देणारे ठरु शकणार आहे.