श्रीकेश शिवयश चौबे (४६, रा. डोंबिवली – पश्चिम) असे आरोपी बोगस पत्रकाराचे नाव आहे. डोंबिवल पश्चिमेत राहणाऱ्या ४५ वर्षीय फुल विक्रेत्या महिलेची छेड काढल्याची तक्रार करण्यात आली. तक्रारीची दखल घेत पोलिसांनी भारतीय न्याय संहितेचे कलम ७४, ७५, ११५ (२) अन्वये गुन्हा दाखल केला आहे. तक्रारदार महिला पश्चिम डोंबिवलीत राहत असून कुटुंबाच्या उदरनिर्वाहासाठी सकाळी ७ वाजल्यापासून रात्री ११ वाजेपर्यंत स्टेशन परिसरात फुले आणि गजरे विक्री करते. या कामात तिला दोन्ही मुले देखील हातभार लावतात. शुक्रवारी रात्री साडेअकराच्या सुमारास या महिलेवर हा संतापजनक प्रसंग ओढावला.

या फूल विक्रेत्या घरी जाण्यापूर्वी डोंबिवली पूर्वेकडे आईस्क्रीम खरेदी करून नेहरू रोडला असलेल्या भाजी मार्केटमधून पायी जात असताना पाठीमागून एक अनोळखी इसम आला. या महिलेशी लगट करून मला तू आवडतेस, असे बोलून त्याने अश्लील चाळे केले. या प्रकाराने महिला भयभीत झाली. त्याच्या तोंडातून दारूचा वास येत होता. तू कोण आहे रे? असे विचारून महिलेने दारूड्याला झटकारले असता त्याने हात पकडून तू माझ्यासोबत येते का? असे विचारले. या महिलेने त्याच्या कानाखाली मारण्यासाठी हात उचलला असता त्याने हात अडवला व तो त्याचा नाकावर लागला. महिलेने आरडाओरडा केल्याने तेथे थांबलेल्या लोकांनी त्या दारूड्याला चांगलाच चोप दिला आणि पोलिस ठाण्यात नेलं. याप्रकरणी सहाय्यक पोलीस निरीक्षक ईश्वर कोकरे अधिक तपास करत आहेत.