तिघांच्या मैत्रीतील वादाने टोक गाठलं

राहुल रमेश नवथर, वय ३५, राहणार गळनिंब, तालुका गंगापूर, असं मृत तरुणाचं नाव आहे. तर कानिफनाथ मावस, योगेश कल्याण नागे, राहणार भिवधानोरा अशी आरोपींची नावं आहे. दरम्यान या प्रकरणी पोलिसांनी दिलेल्या माहितीनुसार, मृत राहुल आणि त्याचे दोन मित्र कानिफनाथ व योगेश हे तिघे मिळून विवधानोरा शिवारातील गट क्रमांक ३०६ येथे शेतात दारू पिण्यासाठी गेले होते.

दोघांनी मिळून मित्राला संपवलं

दारू पीत असताना तिघांमध्ये वर्चस्वावरून वाद झाला. या वादाने टोक गाठलं. वाद इतका विकोपाला गेला, की कानिफनाथ मावस आणि योगेश नागे या दोघांनी मिळून राहुल याच्यावर गावठी कट्ट्याने गोळीबार केला. एक गोळी बरगडी, दुसरी खांद्यावर तर तिसरी गोळी पोटात मारल्याने यात राहुलचा जागीच मृत्यू झाला. या घटनेनंतर दोन्ही मित्रांनी घटनास्थळावरून पळ काढला होता. घटनेची माहिती मिळताच पोलिसांनी घटनास्थळी पाहणी करत आरोपींचा शोध घेतला.

नेवासा फाटा येथे एकाला बेड्या

या प्रकरणातील आरोपीचा पोलीस शोध घेत असताना आरोपी योगेश नागे हा पुण्याला पळून जाण्याच्या प्रयत्नात होता. याची माहिती पोलिसांना मिळतात पोलिसांनी नेवासा फाटा येथून योगेशला बेड्या ठोकल्या आहेत. तर दुसरा आरोपी अद्याप फरार आहे. दरम्यान ही हत्या वर्चस्व वादातून झाली असल्याचा प्राथमिक अंदाज पोलिसांनी वर्तवला आहे. या घटनेने परिसरात एकच खळबळ उडाली असून तरुणाच्या मृत्यूने त्याच्या कुटुंबावर दु:खाचा डोंगर कोसळला आहे.