मिळालेल्या माहितीनुसार, पश्चिम रेल्वेच्या विरार रेल्वे स्थानकातून विरारहून दादरला जाणारी लोकल सुटली. ही लोकल भाईंदर ते दहिसर दरम्यान आली असता लोकल ट्रेनमधील चर्चगेटच्या दिशेने दुसऱ्या महिला डब्या लगतच असलेल्या लगेज डब्यातून महिला डब्याच्या खिडकीवर एक माथेफिरू आला. या माथेफिरूने महिला डब्याच्या पत्र्यावर लाथा बुक्क्यांनी मारून महिलांशी अश्लील वर्तन करत शिवीगाळ केली. त्याचप्रमाणे हा माथेफिरू महिला डब्यामध्ये येण्याचा प्रयत्न करत होता. गुरुवारी सायंकाळी सहा वाजताच्या सुमारास ही घटना घडली आहे.

माथेफिरूने महिला डब्याजवळ अक्षरशः धुडगूस घालत दहशत निर्माण केली. यामुळे महिला प्रवाशांमध्ये देखील भीतीचे वातावरण निर्माण झाले. माथेफिरू उभा असलेल्या खिडकी नजीक असलेल्या महिला उठून दुसऱ्या बाजूला गेल्या. धावत्या लोकल ट्रेनमध्ये माथेफिरूने घातलेला धुडगूस महिलांसोबत केलेले अश्लील वर्तन, शिवीगाळ हा संपूर्ण भीतीदायक थरार लोकल ट्रेनमधून प्रवास करणाऱ्या स्वरा भोसले या महिला प्रवाशाने स्वतः अनुभवला असून ही संपूर्ण घटना त्यांनी आपल्या मोबाईल कॅमेऱ्यात कैद केली आहे.

डब्यातून प्रवास करणाऱ्या महिलांनी रेल्वे हेल्पलाइनवर संपर्क साधण्याचा प्रयत्न केला, मात्र कोणतीही मदत मिळाली नसल्याचे त्यांनी सांगितले. या घटनेमुळे लोकल ट्रेनने प्रवास करणाऱ्या महिला प्रवाशांच्या सुरक्षेचा प्रश्न पुन्हा ऐरणीवर आला असून विकृती आरोपी तरुणाच्या मुसक्या पोलीस कधी आवळणार आणि त्याच्यावर कठोर कारवाई होणार का, हे पाहणं महत्त्वाचं ठरणार आहे.