कृष्णा नदीपात्रात नवीन ब्रीजखाली पाण्यामध्ये पुरुष जातीचा मृतदेह तरंगत असल्याची माहिती मिळाली होती. सांगली शहर पोलीस घटनास्थळी दाखल झाले. यावेळी स्पेशल रेस्क्यू फोर्सच्या मदतीने पाण्यातून मृतदेह बाहेर काढण्यात आला आणि उत्तरीय तपासणीसाठी सांगली शासकीय रुग्णालयात पाठवण्यात आला. तर मृत व्यक्ती जत बांधकाम उपविभाग पंचायत समिती जत येथे कनिष्ठ अभियंता म्हणून कार्यरत असल्याचे तपासात समोर आले. तो मूळचा इस्लामपूर येथील असून आज त्याचा मृतदेह कृष्णा नदीपात्रात पाण्यामध्ये मिळून आल्याने प्रकरणाला गंभीर वळण येणार असल्याचे दिसते. पुढील तपास सांगली शहर पोलीस ठाणे करीत आहे.

जत मधील आमदाराचे स्वीय सहाय्यक तसेच जिल्हा परिषद माजी सदस्य याच्या पती कडून आणि पंचायत समितीच्या कर्मचारी गेल्या सहा महिन्यांपासून त्रास देत असल्याचे नातेवाईकांकडून सांगण्यात आले आहे. तसेच ही आत्महत्या नसून घातपात आहे. जोपर्यंत याच्यावर कारवाई होत नाही तोपर्यंत मृतदेह ताब्यास्तव घेणार नसल्याचा नातेवाईकांनी पवित्रा घेतला आहे.