Pune News: पुण्यात एका आयटी अभियंत्यावर दोन तरुणांनी कोयत्याने हल्ला असून या हल्ल्यात तो गंभीर जखमी झाला आहे. पोलिसांनी तत्परतेने कारवाई करत दोन्ही आरोपींना अटक केली आहे. पोलिसांच्या तपासात धक्कादायक माहिती समोर आली आहे.
पुणे: विमाननगर येथे गुरुवारी पहाटे 3 वाजता घडलेल्या धक्कादायक घटनेत 33 वर्षीय आयटी व्यावसायिकावर दोन तरुणांनी कोयत्याने हल्ला केला होता. म्हाळुंगे येथे राहणारा हा तरुण मूळचा पश्चिम बंगालचा असून तो आपल्या होणाऱ्या पत्नीला जी आयटी कंपनीत कार्यरत आहे तिला घेण्यासाठी गेला असता ही घटना घडली. या हल्ल्यात त्याच्या उजव्या हाताला फ्रॅक्चर झाले असून पाठी व डोक्यावरही जखमा झाल्या आहेत.
या हल्ल्याचा व्हिडिओ सोशल मीडियावर मोठ्या प्रमाणात व्हायरल झाला. येरवडा पोलीस ठाण्यात बीएनएस कलम 118(2) (धोकादायक शस्त्र वापरून गंभीर दुखापत), (सामाईक उद्देशाने हल्ला) या प्रकारचे गुन्हे दाखल करण्यात आले आहेत. याबाबत पोलिसांनी दिलेल्या प्राथमिक माहितीनुसार, व्हिडिओत दिसणाऱ्या दोन्ही आरोपींना हडपसरमधून सहा तासांत अटक करण्यात आली आहे. अटक करुन काल ( शुक्रवारी 12 सप्टेंबर ) रोजी न्यायालयात हजर केल्यावर त्यांना 15 सप्टेंबरपर्यंत पोलिस कोठडी देण्यात आली.
अटक करण्यात आलेल्यांची नावे बालाजी शिवाजी मुंडे आणि सिद्धार्थ ईश्वर डालिया (दोघेही 19, रा. हडपसर) अशी आहेत. मुंडे याच्यावर याआधी दोन गुन्हे हडपसर व काळेपडळ पोलीस ठाण्यात दाखल आहेत तर डालियाचा कोणताही गुन्हेगारीचा इतिहास नाही. हल्ल्यावेळी कोयत्याचा धारदार भाग वापरला नव्हता. त्यामुळे गंभीर जखम टळली. सध्या पीडित तरुणाला रुग्णालयातून डिस्चार्ज देण्यात आला असून तो धोक्याबाहेर असल्याची माहिती पोलिसांनी दिली आहे.
वेगळंच प्रकरण आलं समोर
आरोपींना त्यांच्या कॅब चालक मित्राने बदला घेण्यासाठी विमाननगरमधील एका आयटी कर्मचाऱ्यावर हल्ला करण्यास सांगितले होते. त्या व्यक्तीवर हल्ला करण्याचा त्यांचा बेत होता, पण तो तेथे आलाच नाही. बराच वेळ थांबल्यानंतर चिडून त्यांनी चुकीच्या व्यक्तीवर हल्ला केला, असं पोलीस तपासात समोर आलं आहे. ज्याच्यावर हल्ला झाला तो पीडित तरुण दररोज आपल्या होणाऱ्या पत्नीला तिच्या ऑफिसमधून घरी घेऊन जात असे. त्याच कंपनीत ज्या कॅब ड्रायव्हरने दुसऱ्या एका व्यक्तीवर हल्ला करण्यास आरोपीना प्रवृत्त केलं होतं त्याची मैत्रीण काम करते, मात्र पीडित तरुणी आणि ती महिला एकमेकींना ओळखत नाहीत.
Jalgaon Crime : कौटुंबिक वाद मिटवण्यासाठी जमले, शाब्दिक वाद गुद्द्यांवर; चाकूने वार करत जावयाने मामसासऱ्याला संपवलं
आरोपींकडे नंबर प्लेट नसलेली दुचाकी होती, ती जप्त करण्यात आली आहे. सीसीटीव्ही फुटेजच्या मदतीने त्यांचा माग काढण्यात आला. मुंडेने सुरुवातीला पोलिसांना खोटे नाव व माहिती देऊन दिशाभूल करण्याचा प्रयत्न केला, परंतु पुढील चौकशीत त्याचा सहभाग निष्पन्न झाला.
येरवडा पोलिसांनी सांगितले की, मुंडेला पूर्वी गुन्हेगारी वर्तणुकीमुळे कुटुंबीयांनी मूळगावी पाठवले होते. मात्र, तो परत येऊन पुन्हा गुन्हेगारी विश्वात अडकला. पीडित तरुणीने या घटनेबाबत अधिक सांगितले की, “आम्ही अजूनही या घटनेतून सावरलेलो नाही. आमचा साखरपुडा नुकताच झाला असून लग्न फेब्रुवारीत ठरलेले आहे. माझ्या होणाऱ्या नवऱ्याला गंभीर दुखापत झाली. हा हल्ला पूर्णपणे अनपेक्षित होता.”
दरम्यान, विमाननगर परिसरात वाढत्या गुन्हेगारीवर अंकुश आणण्यासाठी कडक पावले व गस्त वाढवण्याची मागणी आता केली जात आहे. आयटी कंपन्यांच्या परिसरात अनेक अवैद्य धंदे केले जात असल्याने त्यावर लवकर आळा घालण्याची मागणी स्थानिक नागरिकांनी केली आहे.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा