वडगाव मावळमध्ये मागील काही महिन्यांपासून गुन्हेगारी वाढत असल्याचं चित्र आहे. त्यामुळे कायदा व सुव्यवस्थेबाबत प्रश्नचिन्ह निर्माण झालेले असनाच तळेगाव दाभाडे इथं एका तलावात 22 वर्षीय तरुणीचा मृतदेह आढळून आल्याने खळबळ उडाली आहे. साक्षी कांतीकुमार भावर (वय 22) असं मृत तरुणीचं नाव आहे. साक्षी ही वराळे येथील भीमाशंकर कॉलनीमध्ये वास्तव्यास होती. तरुणीचा मृतदेह आढळून आल्याचे कळताच पोलिसांनी घटनास्थळी धाव घेत तपास सुरू केला आहे.याबाबतची सविस्तर माहिती अशी की, साक्षी बेपत्ता झाल्याचे समजताच कुटुंबियांनी साक्षीला बऱ्याच वेळा फोनद्वारे संपर्क करण्याचा प्रयत्न केला. मात्र तिने फोन उचलला नाही. तसंच शोध घेऊनही ती कुठेच आढळत नसल्याने कुटुंबियांनी पोलीस ठाण्यात तक्रार केली. तळेगाव दाभाडे पोलीस स्टेशनमध्ये ती हरवल्याची तक्रार नोंदवण्यात आली आणि पोलिसांनी तिचा शोध घेण्यास सुरुवात केली. “आम्ही तात्काळ मोबाईल लोकेशन तपासले असता ते स्टेशनजवळच्या तलावाच्या परिसरात असल्याचे दिसले,” अशी माहिती स्थानिक पोलीस कर्मचाऱ्यांकडून देण्यात आली आहे.
मोबाईल लोकेशनच्या आधारे पोलिसांनी तलावाच्या परिसरात साक्षीचा शोध सुरू केला. शोध मोहीम सुरू असताना तलावाच्या काठावर साक्षीची बॅग आणि मोबाईल सापडला. तसंच पाण्यात बूट तरंगताना दिसून आले. त्यामुळे पोलिसांना संशय आला आणि पोलीस उपनिरीक्षक भरत वारे यांनी वन्यजीव रक्षक मावळ संस्थेशी संपर्क साधला.
दरम्यान, पोलीस कर्मचारी राजेंद्र बंडगे आणि गणेश गायकवाड यांनी पाण्यात शोध घेतला तेव्हा एका तरुणीचा मृतदेह आढळून आला. पोलिसांनी सदर मृतदेह पाण्यातून बाहेर काढला. साक्षीचा भाऊ घटनास्थळी असल्याने तिच्या मृतदेहाची ओळख पटली. पाण्यातून बाहेर काढल्यानंतर तिला CPR देण्याचा प्रयत्न करण्यात आला होता, पण तो प्रयत्न निष्फळ ठरला.
दरम्यान, “रुग्णवाहिकेतून तिला हॉस्पिटलला नेण्यात आले, मात्र डॉक्टरांनी तिला मृत घोषित केले,” असं पोलिसांकडून सांगण्यात आलं आहे.
