नागोठणे येथील मोहल्ला येथील रहिवासी वाहन चालक असलेला अन्वर अजीज पिंजरी वय 55 वर्षे हा शनिवार 23 ऑगस्ट रोजी सकाळच्या सुमारास ऐतिहासिक नागोठणे – वरवठणे पूलावरून जात असता तोल जाऊन पाण्यात पडले. नदीच्या प्रवाहामुळे ते वाहून गेले. दरम्यान त्यांना वाचवण्याचा प्रयत्नही केला गेला. शोध मोहिमही सुरू करण्यात आली आहे.

पोलिसाचं धाडस पाण्यात उडी पण..
पोलिसांनी दिलेल्या माहितीनुसार,नागोठणे मोहल्ला येथील रहिवासी व वाहन चालक अन्वर अजीज पिंजारी हे शनिवारी सकाळी 10.30 वाजण्याच्या सुमारास ऐतिहासिक नागोठणे – वरवठणे पूलावरून चालत जात असताना त्यांचा तोल जाऊन पाण्यात पडले. त्यानंतर त्यांनी पाण्यात पूलाच्या कठड्याचा आधार घेतला.याची माहिती सहा. पो.नि.सचिन कुलकर्णी यांना मिळताच ते आपल्या सहकाऱ्यांसह घटनास्थळी दाखल झाले. त्यांनी तात्काळ ग्रामस्थांच्या मदतीने त्यांना दोर टाकून वाचविण्याचा प्रयत्न केला परंतु दोर हातातून सुटल्याने अन्वर पाण्यात वाहून पुढे गेले. त्याचवेळी ना पोलिस शिपाई प्रकाश हंबीर यांनी त्याला वाचविण्यासाठी थेट पाण्यात उडी घेतली. पण अंबा नदीच्या पाण्याचा जास्त प्रवाहामुळे ते अन्वरला वाचवू शकले नाही.

सायंकाळी शोध मोहिम थांबवण्यात आली
पोलिस व ग्रामस्थांनी बराच वेळ शोधा शोध करूनही नदीला जास्त पाणी असल्याने तो कुठेही सापडला नाही. त्यानंतर आलेल्या एस.व्ही.आर.एस.एस रेस्क्यू टिमने सायंकाळी 5.00 वाजे पर्यंत शोधण्याचा प्रयत्न केला परंतु त्यांना त्यात यश न आल्याने सदरील मोहीम सायंकाळ झाल्याने थांबविण्यात आली आहे. घटनेचा तपास सहा.पो.नि.सचिन कुलकर्णी यांच्या मार्गदर्शनाखाली ए.एस.आय. रमेश सोनकर करीत आहेत.