Kolhapur News Today: कोल्हापुरातील सिद्धार्थनगर कमानीजवळ दोन गटांमध्ये झालेल्या हिंसक संघर्षामुळे शहरात तणाव निर्माण झाला आहे. राजकीय फलक आणि साऊंड सिस्टीमच्या वादातून सुरू झालेल्या या राड्यामुळे पोलीस अधिकाऱ्यांसह नागरिक जखमी झाले असून वाहनांची तोडफोड व जाळपोळ करण्यात आली आहे.
साईप्रसाद महेंद्रकर, कोल्हापूर: कोल्हापूर शहरातील सिद्धार्थनगर कमानीजवळ शुक्रवारी रात्री दोन गटांत झालेल्या हिंसक संघर्षामुळे कोल्हापूर शहरासह जिल्हा हादरला आहे. फलक, साऊंड सिस्टीम आणि राजकीय छायाचित्रांच्या वादातून उफाळलेल्या या राड्यात चार पोलिस अधिकारी व सहा नागरिक जखमी झाले, तर टेम्पोसह पाच-सहा वाहनांची तोडफोड आणि जाळपोळ करण्यात आली. वरिष्ठ पोलिसांच्या संयुक्त हस्तक्षेपामुळे अखेर दोन-अडीच तासांनंतर परिस्थिती नियंत्रणात आणण्यात यश आले आहे.
पोलिसांकडून मिळालेल्या माहितीनुसार, शुक्रवारी दुपारी सिद्धार्थनगर कमानीवर एका मंडळाने वर्धापन दिनाचा फलक उभारला होता. याठिकाणी साऊंड सिस्टीम व रोषणाईची तयारी सुरू होताच लक्ष्मीपुरी पोलिस ठाण्याचे निरीक्षक श्रीराम कन्हेरकर घटनास्थळी पोहोचले. “बाजूलाच सर्किट बेंच असल्याने ध्वनिक्षेपक परवानगीशिवाय चालणार नाही” असे सांगून त्यांनी काम बंद पाडले व साहित्य ताब्यात घेतले. तरीही संध्याकाळी पुन्हा मंडळाने मोठा फलक उभारून ध्वनिक्षेपक सुरू केला. इतकेच नव्हे तर एका खांबावरील फलकाला हार घालून समोरील गटाला जणू चिथावणीच देण्यात आली. त्यामुळे तरुणांमध्ये तणाव वाढू लागला.
रात्री साडेनऊच्या सुमारास दोन्ही गट आमनेसामने आले. शिवीगाळीतून परिस्थिती चिघळली आणि थेट दगडफेक सुरू झाली. हातात काठ्या, झाडाच्या फांद्या, हत्यारे घेऊन जमाव रस्त्यावर उतरला. अचानक झालेल्या या हिंसाचारामुळे परिसरातून जाणारे वाहनचालक व पादचारी घाबरले. दरम्यान, जमावाने सिद्धार्थनगर-राजेबागस्वार दर्गा परिसरातील वाहनांची जोरदार तोडफोड केली. एका टेम्पोला उलटवून पेटवण्यात आले. पाच मोटारी आणि एक रिक्षाचाही चक्काचूर झाला. पोलिसांनी स्थानिक नागरिकांच्या मदतीने घरांमधून पाणी आणून जळत असलेल्या टेम्पोवर नियंत्रण मिळवले.
माझ्या बाळाला जिवंत करा, पिशवीत नवजात बाळाची बॉडी घेऊन हतबल वडील डीएम ऑफिसमध्ये, अधिकारी सुन्न
यावेळी पोलीस अधीक्षक योगेशकुमार गुप्ता, अपर पोलिस अधीक्षक डॉ. धीरजकुमार, शहर उपअधीक्षक प्रिया पाटील, तसेच शाहूवाडी-करवीरचे उपअधीक्षक आप्पासी पवार, सुजितकुमार क्षीरसागर, स्थानिक गुन्हे शाखेचे निरीक्षक रवींद्र कळमकर आणि कोल्हापूर शहरातील चारही ठाण्यांचा फौजफाटा घटनास्थळी दाखल झाला. दंगल काबू पथकही तातडीने पोहोचवण्यात आले.
जखमींमध्ये पोलिसांचाही समावेश
या दगडफेकीत नागरिकांसह पोलिसही जखमी झाले. यात सद्दाम महात (३४), निहाल शेख (२३), जरियाब इनामदार (३९), अशपाक नायकवडी (२६), इक्बाल सरकवास (४२) यांच्यासह स्थानिक गुन्हे अन्वेषणचे पोलिस उपनिरीक्षक शेष मोरे व लक्ष्मीपुरी ठाण्याचे अंमलदार आबिद मुल्ला यांचा समावेश आहे. सर्वांवर सीपीआर रुग्णालयात उपचार सुरू आहेत.
हिंसाचारामध्ये महिलांचाही जमाव घोषणाबाजीसाठी रस्त्यावर उतरला होता. यावेळी पोलिस अधीक्षक गुप्ता व वरिष्ठ अधिकाऱ्यांनी थेट उपस्थित राहून जमावाला शांत करण्याचे प्रयत्न केले. लोकांनी ध्वज काढल्याची तक्रार पुढे येताच, पोलिसांनी तो पुन्हा त्याजागी लावून परिस्थिती सामोपचाराने निवळवली. महिलांनीही काही तक्रारी अधिकाऱ्यांसमोर केल्या. शेवटी जमावाने टाळ्या वाजवत पोलिसांच्या मध्यस्थीचा स्वीकार केला.
कायदेशीर कारवाईचे आश्वासन
गंभीर परिस्थिती लक्षात घेऊन पोलिस अधिकाऱ्यांनी दोषींवर कठोर कायदेशीर कारवाई केली जाईल, कोणालाही गय केली जाणार नाही, असे स्पष्ट आश्वासन दिले. त्यानंतर जमाव हळूहळू पांगला. रात्री उशिरापर्यंत परिसरात पंचनामा व गुन्हे नोंद करण्याची प्रक्रिया सुरू होती.
दरम्यान, परिस्थितीवर नियंत्रण आणण्यासाठी सुमारे 300 पोलिस कर्मचारी रात्रीभर सिद्धार्थनगर चौकात तैनात राहिले. परिसर अक्षरशः पोलिस छावणीत बदलला होता. वाहतूक वळवावी लागली. संघर्षादरम्यान काहींनी व्हिडीओ शूट करून सोशल मीडियावर व्हायरल करण्याचा प्रयत्न केला. अफवा पसरू नयेत, यासाठी सायबर पोलिसांना अलर्ट करण्यात आले असून अशा पोस्टवर कारवाई केली जाईल, असे पोलिस अधीक्षकांनी स्पष्ट केले.