“मुंबई परिसरात मुसळधार पाऊस आणि पाणी साचल्यामुळे, छत्रपती शिवाजी महाराज टर्मिनस आणि ठाणे स्थानकादरम्यानची मुख्य रेल्वे सेवा पुढील सूचना मिळेपर्यंत बंद करण्यात आली आहे. ठाणे – कर्जत, खोपोली आणि कसारा स्थानकादरम्यान शटल सेवा सुरू आहे.” अशी माहिती मध्य रेल्वेच्या मुंबई विभागीय कार्यालयाच्या अधिकृत ‘एक्स’ हँडलवरुन देण्यात आली आहे.

दुसरीकडे, मुसळधार पावसामुळे चुन्नाभट्टी स्टेशनवर पाणी साचल्यामुळे, कुर्ला आणि सीएसएमटी दरम्यानच्या हार्बर लाईनवरील रेल्वे सेवा पुढील सूचना मिळेपर्यंत स्थगित करण्यात आल्या आहेत, अशीही माहिती आहे.

सरकारी ऑफिसेसना सुट्टी जाहीर

एकीकडे, मुंबईतील सर्व सरकारी, निमसरकारी कार्यालयांना आज (मंगळवार 19 ऑगस्ट 2025 रोजी) सुट्टी जाहीर करण्यात आली आहे. खासगी कार्यालये आणि आस्थापनांनीही आपल्या कर्मचाऱ्यांना घरी राहून काम म्हणजेच वर्क फ्रॉम होम करण्याच्या सूचना द्याव्यात, असं प्रशासनाने सांगितलं आहे.

भारतीय हवामान खात्याने आज बृहन्मुंबई महानगरपालिका क्षेत्र – मुंबई शहर आणि उपनगरे अतिमुसळधार पावसाचा इशारा म्हणजेच रेड अलर्ट दिला आहे. त्याचप्रमाणे मुंबईत सतत पाऊस पडत आहे.

या पार्श्वभूमीवर बीएमसी क्षेत्रातील अत्यावश्यक सेवा वगळता इतर सर्व सरकारी, निमसरकारी कार्यालयं आणि बृहन्मुंबई महानगरपालिका कार्यालयांना जिल्हा आपत्ती व्यवस्थापन प्राधिकरण या नात्याने महापालिकेकडून सुट्टी जाहीर करण्यात आलीय.
Ratnagiri Accident : मुसळधार पावसात सुसाट थारची रिक्षाला धडक, कोकणात एकाच कुटुंबातील तिघांसह पाच जणांचा मृत्यू, चिमुरडाही कालवश

पावसाचा जोर वाढला

गेल्या काही दिवसांपासून पावसाने दडी मारली असताना सोमवारी शहरात पावसाने दमदार पुनरागमन केलं. काही काळ संततधार होती. नंतर शहराच्या सर्वच भागात पावसाचा जोर सायंकाळपर्यंत पाहायला. त्यानंतर काहीशी उघडीप होती. परंतु पुढील दोन दिवसांतही पाऊस कायम राहणार असल्याची शक्यता हवामान विभागाने वर्तवलेली आहे. दरम्यान, आठवड्याच्या पहिल्याच दिवशी शहरात झालेल्या पावसामुळे अनेक ठिकाणी वाहतूक कोंडी झाल्याने नागरिकांना मनस्ताप सहन करावा लागला.