Hit and Run accused arrested: नागपूर ग्रामीण पोलिसांनी एका हिट अँड रन प्रकरणातील फरार ट्रक चालकाला अटक केली आहे. ‘मार्वल’ या एआय प्रणालीच्या मदतीने पोलिसांनी चालकाला शोधून काढले. देवलापार येथे झालेल्या अपघातात एका महिलेचा मृत्यू झाला होता. ट्रक चालकाने घटनास्थळावरून पळ काढला होता.
१० ऑगस्टला अमित भुरा यादव (वय ३५) व त्यांच्या पत्नी ग्यारसी (वय ३०, दोन्ही रा. लोणारा) हे दोघे मोटारसायकलने जात होते. देवलापारमधील मोरफाटा दर्गा परिसरात ट्रकने मोटारसायकलला धडक दिली. यात ग्यारसी यांचा मृत्यू झाला तर अमित हे किरकोळ जखमी झाले. अपघातग्रस्त स्थळावर मदत न मिळाल्याने अमित यांनी मोटरसायकलला पत्नीचा मृतदेह बांधून लोणारा गाठले. यादरम्यान मोटारसायकल मागे मृतदेह बांधलेली चित्रफीत देशभरात व्हायरल झाल्याने समाजमन सुन्न झाले.
मी असा बसतो, तू बुलेट पळव! विद्यार्थ्यांचा जीवघेणा स्टंट; व्हिडिओ व्हायरल होताच पोलिसांचा दणका
याप्रकरणी देवलापार पोलिसांनी प्राणांतिक अपघातासह विविध कलमान्वये गुन्हा दाखल केला. लाल रंगाच्या रेषा असलेल्या ट्रकने धडक दिल्याने पत्नीचा मृत्यू झाल्याचे अमित यांनी पोलिसांना सांगितले. केवळ हा धागा पोलिसांकडे होता. आरोपी ट्रकचालकाचा शोधासाठीचे सर्व सूत्रे पोलिस अधीक्षक हर्ष पोद्दार यांनी हाती घेतली. देवलापारपासून ते पुढे तीन टोल नाके असल्याने पोलिसांनी घटनेच्या वेळीपासूनचे प्रत्येकी चार तासांचे सीसीटीव्ही फुटेज गोळा केले. एकूण बारा तासांचे फुटेज पोलिसांनी ‘मार्वल’ या तंत्रज्ञानात टाकले. पहिल्या पातळीवर लाल रंगाची रेषा असलेल्या ट्रकची निवड करण्याची ‘कमांड’ मार्वलला दिली. मार्वललने सुमारे वीस ट्रकची ओळख पटवली.
दुसऱ्या पातळीवर कोणता ट्रक अपघात करू शकतो, ही कमांड देण्यात आली. अवघ्या दहा मिनिटांत मार्वलने यूपी-१४-एमटी-२१९० या क्रमांकाच्या ट्रकची ओळख पटवली. घटनेच्या वेळी या ट्रकचा वेग ताशी ४० ते ४५ किमी असल्याचेही मार्वलने नोंद केली. क्रमांकाच्या आधारे पोलिसांनी ट्रक व चालकाचा शोध सुरू केला. पोलिसांचे एक पथक उत्तर प्रदेशकडे रवाना झाले. शनिवारी हा ट्रक नागपूरपासून सातशे किमी अंतरावरील पोलिस ग्वालियर-कानपूर मार्गावर असल्याचे निष्पन्न झाले. पोलिसांचे पथक लगेच या मार्गावर पोहोचले. पोलिसांनी ट्रकताब्यात घेत चालकाला अटक केली. त्याला नागपुरात आणले.
निवडणुकीत विजय मिळवून देण्यासाठी दोन कोटींची ऑफर होती, पण… ; अमर काळेंनी सगळं सांगितलं
‘घंटो का काम मिनटों मे’
सहसा बारा तासांचे सीसीटीव्ही फुटेज तपासण्यासाठी चार कर्मचाऱ्यांच्या पथकाला एका आठवड्यापेक्षा अधिकचा कालावधी लागू शकतो. मात्र, मार्वलने अवघ्या काही मिनिटांतच अपघातग्रस्त ट्रकची ओळख पटवून दिली. लाल रंगाची रेषा एवढ्या छोट्याश्या सुगाव्यामुळे मार्वलने आरोपीला शोधून काढले. मार्वल तंत्रज्ञान पोलिसांच्या अत्यंत उपयोगी असून,ग्रामीण भागात ते सर्वाधिक उपयोगी आहे. साक्षीदार फितूर होण्याचा धोका असतो. मात्र तंत्रज्ञानावर आधारित तपासात शिक्षा होण्याचे प्रमाण अधिक असते, असे पोलिस अधीक्षक हर्ष पोद्दार यांनी सांगितले.