माटुंगा पोलिस ठाण्यात दाखल तक्रारीनुसार, अभिनेता अभय झा याची अभिनय क्षेत्रात कार्यरत असलेल्या रोशनकुमार नावाच्या व्यक्तीसोबत ओळख झाली. आपण चित्रपटांना आर्थिक निधी उपलब्ध करून देत असल्याचे, तसेच एखादा मोठा प्रकल्प असल्यास सांगावे, असं रोशनकुमार याने सांगितले. अभय याला एक चित्रपट करण्याची इच्छा असल्याने, त्याने पाच कोटी रुपयांची मदत करू शकाल का अशी विचारणा केली. त्यानंतर वेगवेगळ्या पंचतारांकित हॉटेलमध्ये भेटून रोशनकुमार याने महेंद्रसिंग नावाच्या व्यक्तीकडून हा निधी मिळवून देण्याचे आश्वासन अभय याला दिले. यानंतर रोशनकुमार याने महेंद्रसिंग याच्या बहिणीचे लग्न गावी असून, १७ लाख रुपये पाठवायचे आहेत, मात्र १०० रुपयांच्या नोटा जास्त होत असल्याने त्याऐवजी ५०० रुपयांच्या नोटा हव्या आहेत, असे सांगितले.
मुंबईतल्या ‘या’ पुलासाठी 27 कोटींचा खर्च, आता 7 वर्षांतच हातोडा; कारण काय? महापालिकेच्या नियोजनशून्य कारभारामुळे पैसे पाण्यात
चित्रपटाला निधी मिळणार असल्याने अभय याने होकार देत आपल्याकडील तसेच मित्र आणि नातेवाईक यांच्याकडून गोळा करत १७ लाखांची जमवाजमव केली. सोमवारी ४ ऑगस्टला महेंद्रसिंग याने दादरच्या स्वामीनारायण मंदिराजवळ पैसे घेऊन बोलावले. अभय आपल्या मित्रासह ५०० रुपयांच्या तीन हजार ४०० नोटा घेऊन तेथे पोहोचला.

या ठिकाणी त्यांना आयुष नावाचा व्यक्ती भेटला. त्याने अभय याला कार त्याच ठिकाणी पार्क करण्यास सांगत टॅक्सीने वडाळा येथे नेले. तेथील एका हॉटेलमध्ये रमेश नावाची व्यक्ती त्यांना भेटला. महेंद्रसिंग याने अभयला फोन करून १७ लाख रुपये रमेशकडे देण्यास सांगितले आणि तो बाहेर गाडीत ठेवलेल्या १०० च्या नोटा देईल असे सांगितले. परंतु आधी रमेश आणि त्यापाठोपाठ आयुष हे दोघेही पैशांची बॅग घेऊन गेले, ते परत आलेच नाहीत. एखाद्या चित्रपटातील दृश्याप्रमाणे आपल्याला फसविण्यात आल्याचे लक्षात येताच अभय याने पोलिसांत तक्रार केली.