एअर पाईप फुटल्याने ट्रकचे ब्रेक फेल

खंडाळा पोलिसांनी दिलेल्या माहितीनुसार, साखरेची वाहतूक करणारा ट्रक (एम. एच. १० सी. आर. ४१९७) हा सांगलीहून मुंबईला निघाला होता. खंबाटकी बोगदा ओलांडल्यानंतर एस कॉर्नरजवळ एअरपाईप फुटल्याने ट्रकचे ब्रेक निकामी झाले. चालकाचे ट्रकवरील नियंत्रण सुटले आणि ट्रकने समोरच्या स्कार्पिओला (एम. एच. १४ डी. एन. १५९६) धडक दिली. त्यामुळे ट्रक बेंगरूटवाडी गावच्या हद्दीत कच्च्या रस्त्यावर जाऊन पलटी झाला. या अपघातात दोन्ही वाहनांचे नुकसान झाले असून एक महिलाही किरकोळ जखमी झाली.

Pune Crime : पुण्यात झेड ब्रिजजवळ गँगवॉर, उलट्या कोयत्याने मारलं, गाड्या फोडल्या; Video होतोय तुफान व्हायरल
नागरिकांनी साखरेची पोती पळवली

साखरेचा ट्रक पलटी झाल्याचे समजताच बेंगरूटवाडीतील लोकांनी घटनास्थळी धाव घेऊन अपघातग्रस्त ट्रकमधील साखरेची पोती पळवून नेत अर्धा ट्रक रिकामा केला. य घटनेची माहिती मिळताच खंडाळा पोलीस ठाण्याचे अंमलदार प्रकाश फरांदे, संजय पोळ, संजय जाधव व शिरवळ रेस्क्यू टीम तात्काळ घटनास्थळी दाखल झाले. त्यांनी जखमी महिलेला रुग्णालयात पाठवलं.

साखरेची पोती पळविणाऱ्यांचा शोध सुरू

नेहमीच्या चालकाच्या जागी लखन भिवा दुधाळ ( रा. खवे, ता. मंगळवेढा, जि. सोलापूर) हा बदली चालक ट्रक घेऊन निघाला असताना ट्रकचे ब्रेक फेल होऊन हा अपघात झाला. त्याने खंडाळा पोलीस ठाण्यात फिर्याद दिली आहे. खंडाळा पोलीस ठाण्यात रात्री उशिरा अपघाताची नोंद झाली असून ट्रकमधील लाखो रूपयांची साखरेची पोती पळवून नेणाऱ्यांचा खंडाळा पोलिसांनी शोध सुरू केला आहे.