या प्रकरणी आता सखोल चौकशी केली जाणार आहे. मंदिर समितीचे व्यवस्थापक मनोज श्रोत्री यांनी खरंच ठेकेदारांकडून पैसे घेतले का याची चौकशी करण्यासाठी आता एक कमिटी नेमली जाणार आहे. ही कमिटी आठ दिवसांत चौकशी करुन योग्य तो निर्णय देणार आहे. या दरम्यान व्यवस्थापकांना सक्तीच्या रजेवर पाठवण्यात आलं आहे. कमिटीचा निर्णय येईपर्यंत मनोज श्रोत्री यांना सक्तीच्या रजेवर पाठवण्याचा निर्णय आज मंदिर समितीच्या झालेल्या बैठकीत घेण्यात आला. या सविस्तर घटनेची चौकशी करून मंदिर समितीने हा निर्णय घेतला असल्याची माहिती मंदिर समितीचे सहअध्यक्ष गहिनीनाथ महाराज औसेकर यांनी दिली.

समितीचे सहअध्यक्ष गहिनीनाथ महाराज औसेकर नेमकं काय म्हणाले?

“मंदिर समितीची आज बैठक झाली. या बैठकीत अनेक लोकांच्या तक्रारी होत्या. या तक्रारी 26 तारखेपासून ते 16 तारखेपर्यंतच्या तक्रारी होत्या. या तक्रारीत दोन-तीन महत्त्वाचे विषय होते. पहिला विषय हा पूर्ण मंदिराच्या यात्रेच्या काळात टेंटचा विषय होता. त्या संदर्भात मंदिर व्यवस्थापकांनी काही पैसे घेतल्याच्या व्हिडीओ क्लिप्स व्हायरल झाल्या होत्या. त्याच पार्श्वभूमीवर आज मंदिर व्यवस्थापक मनोज श्रोत्री यांना सक्तीच्या रजेवर पाठवले आहे. त्यासाठी एक समिती गठीत केली आहे. ती समिती येत्या आठ दिवसांत सगळा अहवाल देईल”, अशी माहिती गहिनीनाथ महाराज औसेकर यांनी दिली.