कोण आहे गोकुळ झा?

गोकुळ झा हा सराईत गुन्हेगार असल्याची माहिती समोर आली आहे. त्याच्या नावावर कल्याण, कोळशेवाडी, उल्हासनगर या परिसरात दरोड्यासह मारहाणीचे गुन्हे दाखल आहेत. कल्याण पूर्व येथील नांदिवली परिसरामध्ये फेरीवाल्यांकडून गोकुळ झा हप्ते वसुली करत असल्याचा आरोप शिवसेना शिंदे गटाचे शहर प्रमुख निलेश शिंदे यांनी केला आहे. गोकुळ झा हा चार दिवसांपूर्वीच तुरुंगातून सुटला होता. गोकुळवर याआधी दोन गुन्हे दाखल आहेत. ⁠हत्यार बाळगणे आणि मारहाण करणे अशाप्रकारचे दोन गंभीर गुन्हे दाखल आहेत. ⁠एक गुन्हा विठ्ठलवाडी आणि एक गुन्हा कोसळेवाडी पोलीस स्टेशनमध्ये दाखल असल्याची माहिती समोर आली आहे. एका गुन्ह्यांत त्याने हत्याराने मारहाण केली होती तर दुसऱ्या गुन्ह्यामध्ये त्याने ट्रक चालकाला मारहाण केल्याचा गुन्हा दाखल आहे. ⁠कोळसेवाडी पोलीस स्टेशनमध्ये ट्रक चालकाला मारहाण केल्याप्रकरणी गुन्हा दाखल केला होता. या प्रकरणात गोकुळला अटक झाली होती. चार दिवसांपूर्वीच गोकुळ हा जामिनावर सुटून बाहेर आला होता.
कल्याण मारहाण प्रकरणात नवा ट्विस्ट; हाणामारीआधीचा VIDEO समोर, रिसेप्शनिस्टनं काय केलेलं?

कल्याणमध्ये रिसेप्शनिस्ट तरुणीला मारहाण

21 जुलैला कल्याणमधील एका रुग्णालयात रिसेप्शनिस्ट म्हणून काम करणाऱ्या मराठी तरुणीला बेदम मारहाण करण्यात आली होती. या घटनेमुळे परिसरात संतापाची लाट उसळली होती. तरुणीला मारहाण करणारा आरोपी गोकुळ झा हा फरार झाला होता. त्यानंतर अविनाश जाधव यांच्या आदेशावरुन महाराष्ट्र नवनिर्माण सेनेच्या कार्यकर्त्यांनी (MNS) या गोकुळ झा याला शोधायला सुरुवात केली. पोलिसांच्या आधी मनसेचे पदाधिकारी योगेश गव्हाणे यांनी गोकुळ झा या शोधून काढले. यानंतर त्याला पोलिसांच्या ताब्यात देण्यात आले. पोलीस उपायुक्त अतुल झेंडे यांनी दिलेल्या माहितीनुसार वेगवेगळ्या पद्धतीने त्याची चौकशी करून त्याला कठोर शिक्षा होईल, यासाठी पोलिसांचा प्रयत्न असणार आहे.

⁠मनसे कार्यकर्त्यांनी मारहाण झालेल्या तरुणीची भेट घेतली आणि तिला न्याय मिळवून देणार असल्याचं सांगितलं. तसेच, मनसेने या तरुणीच्या संपूर्ण उपचाराची जबाबदारी घेतली आहे. या घटनेमुळे कल्याण शहरात तणावाचे वातावरण निर्माण झाले होते.